टेकराज भुसाल
बुटवल । राष्ट्रिय जनमाेर्चाका अध्यक्ष तथा पुर्व उपप्रधानमन्त्री चित्रबहादुर केसीले एमाले, काङ्ग्रेस र माओवादीका लागि चुनाव सबथोक भएको बताउनु भएको छ।
राष्ट्रिय जनमाेर्चा रुपन्देहीले बुटवलमा आयोजना गरेको कार्यकर्ता भेलालाई सम्बाेधन गर्दै अध्यक्ष केसीले साे कुरा बताउनुभएको हो।
अध्यक्ष केसीले राष्ट्रघाती एमसिसि सम्झौता खतरा भएको बताउदै एमसिसि विरुद्ध सङ्घर्ष र जनतालाई प्रशिक्षित गर्नुपर्ने बताउनुभयो ।
एमसिसि सम्झौता ब्याख्यात्मक भनी नाटकीय शैलीमा पास गरेको भन्दै जनताको आन्दोलनले त्यो राष्ट्रघाती सम्झौता खारेज गर्नुपर्ने बताउनुभयो ।
राष्ट्रियता र जनजीविकाको मुद्दा माथि पटक पटक कुठाराघात भइरहेको बताउँदै यस्ता शक्तिलाई पराजित नगरीकन राष्ट्रियतालाई बचाउन नसकिने भन्दै अध्यक्ष केसीले यस्तो परिस्थितिमा राष्ट्रिय जनमोर्चाका नेता कार्यकर्ताको भूमिका अत्यन्तै महत्त्वपूर्ण हुने भएकोले सबै नेता कार्यकर्ताहरुलाई सक्रिय र जुझारुपूर्वक लाग्न आग्रह समेत गर्नुभएकाे छ।
कार्यक्रममा अखिल नेपाल किसान महासंघका उपाध्यक्ष चन्द्रबहादुर केसी, राष्ट्रिय जनमाेर्चाका नेता सुरेश थापा लगायतका नेताहरूले बाेल्नु भएको थियो।
कार्यक्रम राष्ट्रिय जनमाेर्चा रुपन्देहीका अध्यक्ष बद्रे आलमकाे अध्यक्षता सचिव टानबहादुर खत्रीको संचालनमा सम्पन्न भएको थियो।
फाल्गुन २६ गते, २०७८ मा प्रकाशित
