अर्घाखाँचीमा नयाँ वर्ष २०७९ लाई स्वागत गर्दै हर्षोल्लासपूर्वक मनाइयो पहिलो दिन (फोटो फिचर)

सन्धिखर्क, अर्घाखाँची (अर्घाखाँचीडट्कम) । अर्घाखाँची जिल्लामा आज विक्रम संवत् २०७९ वैशाख १ गते नयाँ वर्षको पहिलो दिन एकआपसमा शुभकामना आदानप्रदान गरी मनाइएको छ ।

जिल्लाभर वर्षको पहिलो दिन धेरै मानिस मठमन्दिरमा गई पूजा आराधना गरेका छन् । आज सूर्यले मीन राशिको भोग समाप्त गरी मेष राशिबाट भोग शुरू गर्ने दिन, वैशाख सङ्क्रान्ति अर्थात् मेष सङ्क्रान्ति तथा वर्षको जेठो दिनका रुपमा मनाइने प्राचीन परम्परा छ । 

यस्तै सन्धिखर्कको लदाम बगैचामा टिकटक र सेल्फी खिच्नेको घुईचो लागेको थियो । हरेक व्यक्तिले आज गत वर्ष गरेका कामको सफलता÷असफलता मूल्याङ्कन गरी असफलता दोहोरिन नदिने र सफलता प्राप्त गर्न योजना निर्माण एवं सङ्कल्प गरेका छन् ।

आज बिहानै नुहाउने, घरकोठा–आँगन सफा गर्ने, मीठोमीठो खाने, साथीसङ्गति तथा इष्टमित्रसँग सामाजिक सञ्जाल वा फोन सम्पर्कबाट भेटघाट गरी एकापसमा शुभकामना व्यक्त गरी नयाँ वर्ष मनाइएको छ । 

सन्धिखर्क लगायत जिल्लाभर साथीभाई एवं इष्टमित्रसँग भेटघाट गरेर मनाउनेको लर्को देखिन्थ्यो । मठ, मन्दिर, उद्यान, स्मारक जस्ता स्थलमा सामूहिक वनभोज गरी नयाँ वर्ष मनाएको दृश्य पनि देखिन्थ्यो । कोरोनाको जोखिमका कारण विसं २०७७ र २०७८ राम्रोसँग मनाउन नपाएका मानिस विभिन्न मठ, मन्दिर, पार्कलगायत स्थलमा हिँडेको देखिन्थ्यो ।  

सूर्यको गतिसँग चल्ने भएकाले विक्रम संवत् शाश्वत भएको बताइन्छ ।  सूर्य मेष राशिमा प्रवेश गर्दा शुरू भएर मीन राशि छोड्दा यो संवत्को पुरानो वर्ष सकिएर नयाँ वर्ष शुरू हुने भएकाले वैज्ञानिक रहेको विद्वानहरुको भनाइ छ । सौरमान र चान्द्रमानको समन्वय पनि विक्रम संवत्मा भएको छ । कलियुग शुरू भएको तीन हजार ४४ वर्षपछि विक्रम संवत् शुरू भएको हो ।