पौष १० गते, २०७९ मा प्रकाशित
नविन रसाईली
अर्घाखाँची । सन्धिखर्क नगरपालिका वडा नं. ३ मा रहेको श्री बराहनेटा आधारभुद विद्यालय कक्षा ७ मा गणित विषय पढाइ भएको छैन् । ०७९ सालको शैक्षिक शत्र सुरु भए देखि नै कक्षा ७ मा गणित विषय पढाइ नभएको विद्यालयले जनाएको छ ।
बराहनेटामा कक्षा ७ मा २३ जना विद्यार्थीहरुले अध्ययन गर्छन् । यस अघिका शैक्षिक शत्रमा विज्ञान पढाउने शिक्षकले गणित विषय पढाउने गरेकोमा यस वर्ष त्यो पनि कार्यान्वयन नभएपछि विद्यार्थीहरुले गणित पढ्न नपाएका विद्यालयका प्रधानध्यापक कृष्ण प्रसाद आचार्यले बताए । विद्यालयमा विषयगत शिक्षकको अभाव भएपछि विद्यार्थीले गणित विषय नपढि परिक्षा दिनुपर्ने बाध्यता आएको हो ।
विगतका वर्षहरुमा झै विज्ञान शिक्षकलाई गणित विषय पढाउन अनुरोध गर्दा समेत विज्ञान शिक्षकले गणित आफुले नपढाउने बताएको विद्यार्थीहरुले बताएका छन् । विद्यार्थीहरुले पढ्न नपाएपछि भविष्य अन्योलमा परेको भन्दै चिन्ता व्यक्त गरे । ‘अरु विषयको पढाई अब सकिन लाग्यो तर गणितको सुरु नै भएको छैन् ।’ विद्यार्थीले भने ।
सन्धिखर्क नगरपालिकाले गणित विषय अध्यापनको लागि परिपत्र गरेको जनाएको छ । सोही विद्यालयमा कार्यरत शिक्षक सुदिप के.सीलाई गणित विषय पढाउन परिपत्र गरेको सन्धिखर्क नगरपालिका शिक्षा अधिकृत मञ्जु आचार्यले बताइन् । नगरपालिकाले परिपत्र गरेपनि शिक्षक सुदिप केसीले जिम्मेवारी पुरा नगरेको आचार्यले बताईन् । कुल १ सय ६० जना विद्यार्थी रहेको बराहनेटा आ.विमा हाल १२ जना शिक्षक कर्मचारी रहेका छन् ।
अन्य समाचारहरु
