फाल्गुन २९ गते, २०७९ मा प्रकाशित
एजेन्सी । अमेरिकी सरकारले धरासायी बनेको सिलिकन भ्याली बैंकमा रहेको सम्पूर्ण निक्षेपकर्ताको सम्पत्तिको सुरक्षा गर्ने घोषणा गरेको छ ।
सिलिकन भ्याली बैंक एकाएक धरासायी भएपछि उत्पन्न त्रासले वित्तीय संकट निम्त्याउने खतरा बढेपछि संघीय सरकारले नै बैंकमा रहेको सबै निक्षेपको सुरक्षा गर्ने घोषणा गरेको हो । अर्थ मन्त्रालय, केन्द्रीय बैंक फेडरल रिजर्भ र फेडरल डिपोजिट इन्स्योरेन्स कर्पोरेसनले संयुक्त रुपमा उक्त बैंकका सबै ग्राहक र निक्षेपकर्ताहरुको सम्पत्तिकाे सुरक्षा गर्ने बताएका हुन् ।
उनीहरुले जारी गरेको संयुक्त विज्ञप्तिमा भनिएको छ,-‘हामी अमेरिकी बैंकिङ प्रणालीप्रति सर्वसाधारणको विश्वास कायम राख्दै अमेरिकी अर्थतन्त्र जोगाउन प्रतिवद्ध छौं ।’ यस्तो प्रतिवद्धताले अमेरिकी बैंकिङ प्रणाली निर्वाध चल्ने र आममानिसमा बढेको त्रास समेत हट्ने विश्वास पनि सरकारले गरेकाे छ । तर नियामक निकायहरुले संकटमा परेको सिलिकन भ्याली बैंकको ऋणमोचन गरी उद्धार गर्ने बारेमा केही बताएका छैनन् ।
अमेरिकी अर्थमन्त्री जनेट येलनले सन् २००८ को जस्तो ऋणमोचन नहुने प्रष्ट पार्दै आफूहरुको चासो निक्षेपकर्ताको सम्पत्ति सुरक्षामा रहेको बताउनुभएको छ । उता, राष्ट्रपति जो बाइडेनले बैंकलाई त्यो अवस्थामा पुर्याउनेहरुलाई जवाफदेही बनाउन आफू प्रतिवद्ध रहेको भन्दै ठूला बैंकहरुको निगरानी बढाउने बताउनुभएको छ ।
राष्ट्रपति बाइडेनले त्यस विषयमा साेमबार थप घोषणा गर्ने तयारी गर्नुभएको जनाइएकाे छ ।
अन्य समाचारहरु
