धादिङमा बस दुर्घटना हुँदा ८ जनाको मृत्यु

धादिङ- धादिङमा सडकबाट त्रिशूली नदीमा यात्रुवाहक बस खस्दा ८ जनाको मृत्यु भएको छ । धादिङको गजुरीमा भएको दुर्घटनामा अरु १५ जनाको उद्धार गरिएको छ ।

काठमाडौँबाट पोखरा जाँदै गरेको बस धादिङको गजुरी गाउँपालिका–२ चालिसेस्थित छहराबाट त्रिशूली नदीमा खसेको हो ।

काठमाडौँबाट पोखरातर्फ जाँदै गरेको प्रदेश ३–०१–००५ ख ९९५२ नम्बरको बस अनियन्त्रित भई सडकबाट त्रिशूली नदीमा खसेको हो । हाल उद्धार कार्य जारी रहेको प्रहरीले जनाएको छ ।

दुर्घटनामा भएको मानवीय क्षतिको पूर्ण विवरण भने आइसकेको छैन ।