भाद्र ११ गते, २०८० मा प्रकाशित
काठमाडौं । सरकारी वकिल कार्यालयले सुन तस्करी प्रकरणमा मुछिएका सत्तारुढ नेकपा माओवादी केन्द्रका उपाध्यक्ष कृष्णबहादुर महरा र उनका छोरा राहुल महरामाथि छानबिन गरी पुरक प्रतिवेदन ल्याउन प्रहरीको केन्द्रीय अनुसन्धान ब्युरो (सीआईबी) लाई निर्देशन दिएको छ ।
त्रिभुवन अन्तर्राष्ट्रिय विमानस्थलबाट सुन भित्र्याउने चिनियाँ तस्करसँग सम्बन्ध पुष्टि हुँदा समेत सरकारले पूर्व सभामुख एंव माओवादी नेता महरा र उनका छोरा राहुललाई अनुसन्धानको दायरामा ल्याउन सकेको छैन । महरा बाबु–छोराको सम्पर्क विद्युतीय चुरोट ‘भेप’ मा लुकाएर सुन तस्करी गर्ने समूहसँग रहेको देखिएको छ । २०७९ पुस १० मा दुबईबाट ‘भेप’ मा लुकाएर सुन ल्याउने समूहका चिनियाँ नागरिक दाओजिन वाङसँग महरा र उनका छोराहरूको बाक्लो सम्पर्क भएको देखिएको छ ।
यस्तो छ भेप प्रकरण ?
२०७९ पुस १० गते फ्लाइ दुबईको उडानबाट चिनियाँ नागरिक ली हानसोङ काठमाडौं आएका थिए । उनले आफ्नो लगेजमा ७३ वटा प्याकभित्र ७३० वटा विद्युतीय चुरोट ‘भेप’ ल्याएका थिए । व्यापारिक प्रयोजनका लागि अवैध ढंगले ल्याएको भन्दै उक्त भेप अन्तर्राष्ट्रिय त्रिभुवन विमानस्थलमा जफत गरियो । त्यसमै राखेर सुन ल्याइएको थियो । विमानस्थलका सुरक्षा गार्ड निर्मल विकले भेपभित्र सुन रहेको पत्ता लगाएका थिए ।
त्यसपछि भन्सारको गोदाममा रहेका ती भेपबाट सुन झिकेर बिक्री गरिएको थियो । ९ किलो ११.५२४ ग्राम सुन भन्सारको गोदामबाटै चोरेर बिक्री गरिएको थियो । यो प्रकरणमा भन्सारका कर्मचारी नै संलग्न रहेको अनुसन्धानका क्रममा पुष्टि भएको थियो । उक्त सुन प्रकरणमा सीआईबीले करिब दुई महिना लगाएर अनुसन्धान गरेपछि सरकारी वकिलको कार्यालयलाई अनुसन्धान प्रतिवेदन बुझाएको थियो । काठमाडौँ जिल्ला अदालतले साउन २ गते यो मुद्दामा प्रारम्भिक सुनुवाइ गर्दै भन्सारका कर्मचारीसहित पाँच जनालाई पुर्पक्षका लागि कारागार चलान गर्न आदेश दिएको थियो ।
अन्य समाचारहरु
