मंसिर ७ गते, २०८० मा प्रकाशित
काठमाडौंमा नेकपा एमालेनिकट युवा संघ र मेडिकल व्यवसायी दुर्गा प्रसाईं समूहका आज छुट्टाछुट्टै शक्ति प्रदर्शन भइरहेका छन् । एउटा व्यक्तिविरुद्ध पूरै पार्टी नै उतारेका एमाले अध्यक्ष केपी शर्मा ओली भने आज पोखरा रंगशालामा छन् ।
पोखरामा केपी ओली कप क्रिकेटको उद्घाटनमा सहभागी हुन ओली बिहीबार बिहान साढे १० बजे पोखरा आएका हुन् ।उद्घाटन समारोहको सम्बोधनमा अध्यक्ष ओलीले काठमाडौंमा भइरहेको प्रदर्शन मात्र होइन, कुनै पनि राजनीतिक अभिव्यक्ति दिएनन् । उनले रंगशाला निर्माण, खेलाडीको विकासमा सरकारले ध्यान दिनुपर्ने बताए ।
सम्बोधनपछि उनी क्रिकेट मैदान छिरेका थिए । उनले दुई बलिङ र दुई बलको सामना गरे । ओलीले ब्याटिङ गर्दा पार्टी उपाध्यक्ष विष्णु पौडेलले बलिङ गरेका थिए । ओलीले दुवै बल ब्याटले छोएका थिए । ओलीको बलिङमा उपाध्यक्ष पौडेलले ब्याटिङ गरेका थिए ।
अध्यक्ष ओलीले अहिले बागमती प्रदेश र मदन भण्डारी स्पोर्ट्स एकेडेमीबीचको खेल हेरिरहेका छन् । ओली दिउँसो ३ बजेपछि काठमाडौं फर्कने कार्यक्रम छ । ओलीले काठमाडौंको प्रदर्शनमा सम्बोधनको जिम्मा महासचिव शंकर पोखरेललाई छोडेका छन् ।
अन्य समाचारहरु
