मंसिर १२ गते, २०८० मा प्रकाशित
काठमाडौं- नक्कली भुटानी शरणर्थी बनाई अमेरिका पठाउने प्रलोभन देखाएर ठगी गरेको अभियोगमा उच्च अदालत पाटनमा चलिरहेको बहसमा पूर्व गृहमन्त्री बालकृष्ण खाणको बहस सकिएको छ। खाणका तर्फबाट सोमबारदेखि बहस सुरु भएको थियो।
खाणले वरिष्ठ अधिवक्ता, पूर्व महान्यायाधिवक्ता र नेपाल बार एसोसिएसनका पूर्व अध्यक्षहरु मैदान उत्रेका छन्। खाणलाई थुनामा पठाउने जिल्ला अदालत काठमाडौंको आदेश बदर हुनुपर्ने माग गर्दै आइतबार वरिष्ठ अधिवक्ता हरिहर दाहाल, बद्रीबहादुर कार्की लगायतले बहसको सुरुवात गरेका थिए। त्यसलाई निरन्तरता दिँदै सोमबार ७ जनाले बहस गरेका छन्।
पूर्व महान्यायाधिवक्ता खम्बबहादुर खाती, बद्रीबहादुर कार्की, प्रेमबहादुर खड्का, कृष्णप्रसाद सापकोटा, महादेव यादव तथा सुरेन्द्र महतोले बहस गरेका छन्। आइतबारको बहसका क्रममा उनीहरुले मुख्य रुपमा तीन कुरा उठाएका थिए।
बहसका क्रममा वरिष्ठ अधिवक्ताहरुले गृहमन्त्रीको रुपमा खाणको समयमा मात्र यो प्रकरण नभएकाले त्यसअघिका गृहमन्त्रीहरु किन छानबिनमा आएनन्, तत्कालीन सचिव प्रेमकुमार राई अहिले अख्तियार दुरुपयोग अनुसन्धान आयोगका प्रमुख आयुक्त प्रेम राईलाई किन मुद्दा दायर भएन र रकम नै लेनदेन पुष्टि नभएकाले ठगीको अभियोग पुष्टि नै नहुने दाबी गरे।
उनीहरुले यदि खाणको संलग्नता वा दोषी मान्ने हो भने त्यसअघिका गृहमन्त्रीहरुलाई पनि मुद्दा दायर हुनुपर्ने नत्र कसैलाई छानेर मुद्दा चलाउनु पूर्वाग्राही हुने तर्क अघि सारे।
हालसम्म १८ जनाको बहस सकिएको छ। उच्च अदालतमा २२ जनाले वेरितको निवेदन दिएका थिए। मंगलबार पूर्व उपप्रधानमन्त्री टोपबहादुर रायमाझीका तर्फबाट बहस हुनेछ। एमालेका सचिव रहेका रायमाझी जिल्ला अदालतको आदेशपछि सांसदबाट समेत निलम्बनमा छन्।
उनीहरुको बहसपछि उच्चले सरकारी पक्षलाई बहसको समय दिनेछ। सरकारी पक्षले बहस गरेपछि निवेदकहरुले जवाफी बहस गर्नेछन्। उनीहरुको जवाफी बहसपछि अदालतले निर्णय सुनाउनेछ।
उच्च अदालतका न्यायाधीशद्वय जनक पाण्डे र प्रकाश खरेलको संयुक्त इजलासमा निरन्तर हेर्दा हेर्दै राखेर सुनुवाइ भइरहेको छ।
काठमाडौं जिल्ला अदालतले गत असार १ मा गरेको थुनछेकको आदेशलाई त्रुटिपूर्ण भएको भन्दै वेरितको निवेदन दिएका थिए। उक्त निवेदनमा गत मंगलबारदेखि नियमित सुनुवाइ सुरु भएको थियो।
अन्य समाचारहरु
