काठमाडौँ । जल तथा मौसम विज्ञान विभागको मौसम पूर्वानुमान महाशाखाका अनुसार चिसो अझै केही दिन बढ्ने भएको छ ।

अझै हिउँदे वर्षा नभएकाले पनि यो वर्षको जाडो लम्बिन सक्ने महाशाखाले जनाएको छ । चिसो र शीतलहर बढ्ने भएकाले सतर्क रहन महाशाखाले सुझाव दिएको छ ।

चिसो बढ्दै जाँदा काठमाडौँलगायतका देशका सबै स्थानमा तापक्रम घटेको छ । काठमाडौँमा बिहीबार र शुक्रबारको न्यूनतम तापक्रम तीन डिग्री सेल्सियसमा स्थिर रहेकोमा शनिबार घटेर २.५ डिग्री र आइतबार बिहान पौने ६ बजे २.२ डिग्री सेल्सियस पुगेको महाशाखाले जनाएको छ । यो यस वर्षको हिउँदको अहिलेसम्मकै कम न्यूनतम तापक्रम मापन भएको हो ।

गत वर्षको तुलनामा यस वर्षको चिसो यस अङ्कमा न्यूनतम तापक्रम पुग्न २० दिन पछि भएको छ । गतवर्ष जनवरी ७ तारिखमा न्यूनतम तापक्रम २.५ डिग्री सेल्सियस रेकर्ड भएको थियो । यसवर्ष जाडो फागुनको अन्तिमसम्म रहन सक्ने र वर्षा भएमा चिसो धकेलिएर पूर्वमनसुनको समयसम्म पनि पुग्न सक्ने महाशाखाको अनुमान छ ।

अहिलेसम्म वर्षा हुने राम्रो प्रणाली नदेखिएको र भएको प्रणाली पनि आकाशको धेरैमाथि रहेको मौसमविद् गोविन्द झाले बताउनुभयो । हिमाली भेगको चिसो माइनसबाट तलतिर झर्ने क्रम जारी रहेको बताइएको छ ।

जस अनुसार जुम्लामा न्यूनतम तापक्रम माइनस ५.३ डिग्री सेल्सियसभन्दा तल पुग्ने क्रममा छ । त्यस्तै जोमसोममा माइनस ५.५ डिग्री पुगेको छ भने नौ हजार मिटरमाथिको उच्च हिमाली भेगको पश्चिमी हिमाली भेगमा न्यूनतम तापक्रम माइनस ४१ डिग्री पुगेको छ । त्यसैगरि मध्य क्षेत्रको उच्च हिमाली भेगमा माइनस ४३ डिग्री र पूर्वी क्षेत्रको उच्च हिमाली भेगमा माइनस ४५ डिग्री पुगेको छ ।

उच्च हिमाली भेगमा हिउँ धेरै नपरे पनि चिसो बढेकाले त्यसको प्रभावले तराईका जिल्लाहरुमा शीतलहर बढेको छ । लुम्बिनी, मधेश र कोशी प्रदेशका विभिन्न जिल्लामा वायुमण्डलको पारदर्शिता शुन्य हुँदा हवाई उडानसमेत प्रभावित भएको छ । पश्चिम, मध्य र पूर्वी तराईमा शीतलहर चलेको महाशाखाले जनाएको छ ।