अर्घाखाँचीको धारापानीमा एक दिने निःशुल्क आँखा शिविर सम्पन्नः २ सय बढिले लिए सेवा (तस्बिर सहित)

बैशाख–२९, धारापानी –  अर्घाखाँचीको भूमिकास्थान–४,धारापानीमा एक दिने निःशुल्क आँखा शिविर सम्पन्न भएको छ ।

भूमिकास्थान नगरपालिकाको आयोजना र जिल्ला आँखा अस्पताल अर्घाखाँचीको समन्वयमा शनिबार गरिएको शिविरमा २ सय जना भन्दा धेरै व्यक्तिले सेवा लिएका छन् । निशुल्क आँखा शिविरबाट २ सय ३७ जनाले आँखा सम्बन्धी स्वास्थ्य सेवा लिएको भूमिकास्थानका स्वास्थ्यशाखा प्रमुख देव बहादुर थापाले जानकारी दिनुभएको छ ।

चेकजाँचका क्रममा ९० जनालाई निःशुल्क चस्मा बितरण गर्नुका साथै ५ जनाको आँखामा समस्या देखिएकोले आँखाको अप्रेसनका लागि सुझाव दिइएको अर्घाखाँची आँखा अस्पताल प्रमुख सागर घिमिरेको भनाई छ ।

आम नागरिकलाई सहज वाताबरणमा आँखाको चेक जाँच गरी आफ्नै घर आँगनमा आँखा विशेषज्ञ टोलीमार्फत उपचार गराउन पाउँदा धारापानी सहित विभिन्न स्थानबाट सेवा लिन त्यहाँ पुगेका स्थानिय बासिन्दा खुसी भएका छन् ।

विगतका दिनमा समेत विभिन्न निःशुल्क स्वास्थ्य शिविर सञ्चालन गर्दै आएको बताउँदै भूमिकास्थान नगरप्रमुख झविलाल थापाले आउँदा दिनमा समेत यस्ता शिविरलाई निरन्तरता दिंदै जाने वचन दिनुभएको छ । नगरप्रमुख थापाले शरिरका सवै अङ्गको आफ्नै महत्व भएपनि आँखा सबै भन्दा महत्वपूर्ण अङ्ग भएकोले निःशुल्क आँखा शिविर सञ्चालन गरिएको स्पष्ट पार्नुभएको छ ।

भूमिकास्थानले जेठ ५ गते शनिबार नुवाकोट मा.वि.चिदिचौरमा पनि एकदिने निःशुल्क आँखा शिविरको आयोजना गरेको बताइएको छ ।