घरभित्रै पति–पत्नीको विभत्स हत्या

काभ्रे । काभ्रेको महाभारतमा पति–पत्नीको विभत्स हत्या भएको छ । उनीहरुको हत्या कसले र किन गर्‍यो खुलेको छैन । जिल्ला प्रहरी कार्यालय काभ्रेले दिएको जानकारीअनुसार महाभारत गाउँपालिका–४ महादेवटारका ६० वर्षीय मानबहादुर बल र उनकी ५० वर्षीया श्रीमती केकाइमाया बल मंगलबार साँझ घरभित्रै मृत भेटिएका हुन् ।

टाउकोमा हम्मरले हानेर उनीहरुको हत्या गरेको अवस्थामा शव फेला परेको महाभारत गाउँपालिका अध्यक्ष कान्छालाल जिम्बाले जानकारी दिए । प्रहरीले भने हत्याको पुष्टि गरे पनि घटनाको विस्तृत विवरण खुलाएको छैन । बल दम्पतीले गाउँमा पसल सञ्चालन गर्दै आएका थिए । उनीहरु दुई जना मात्रै जस्ताले बारेको र जस्ताले नै छाएको घरमा बस्दै आएका थिए।

घटनापछि इलाका प्रहरी कार्यालय देवीटार, प्रहरी चौकी फोक्सिङटारको प्रहरी टोली मंगलबार साँझ घटनास्थल पुगेको थियो । जिल्ला प्रहरी कार्यालयबाट प्रहरी नायव उपरीक्षक राजकुमार श्रेष्ठको नेतृत्वमा र इलाका प्रहरी कार्यालय मङ्गलटारबाट पनि प्रहरी टोली घटनास्थलमा अनुसन्धानको लागि पुगेको थियो ।

मंगलबार दिउँसो बल दम्पती स्थानीयले गर्ने ठाकुर पूजामा सहभागी नभएपछि उनीहरुको हत्या भएको खुलेको हो । उनीहरु पूजास्थलमा नआएपछि छिमेकीले पूजामा किन आएन भनेर फोन गरेका थिए । फोन नउठेपछि पूजा गरिएको बोकाको मासुको भाग लिएर छिमेकी उनीहरुको घरमा जाँदा बल दम्पतीको हत्या भएको अवस्थामा भेटिएका थिए ।

-एनपी