श्रावण ६ गते, २०८१ मा प्रकाशित
काठमाडौँ- प्रधानमन्त्री केपी शर्मा ओलीले आज विश्वासको मत लिने भएका छन् । आज बस्ने प्रतिनिधि सभा बैठकमा ओलीले विश्वासको मत लिने भएका हुन् ।
उनले आज चौथो पटक प्रधानमन्त्री बनेपछि पहिलो संसद् सम्बोधन पनि गर्ने एमालेका प्रमुख सचेतक महेश बर्तौलाले जानकारी दिए ।
ओली साउन ३० गते प्रधानमन्त्रीमा नियुक्त भएका थिए । राष्ट्रपति रामचन्द्र पौडेलले संविधानको धारा ७६ को उपधारा २ अनुसार ओलीलाई प्रधानमन्त्रीमा नियुक्त गरेका हुन् ।
उनी पहिलो पटक २०७२ असोज २५ गते प्रधानमन्त्री बनेका थिए भने दोस्रो पटक २०७४ फागुन ३ गते प्रधानमन्त्री नियुक्त भएका थिए । त्यस्तै उनी तेस्रो पटक २०७८ वैशाख ३० गते प्रधानमन्त्रीमा नियुक्त भएका थिए ।
२७५ सदस्यीय प्रतिनिधि सभामा दुई तिहाई मत पुर्याउन ओलीले कम्तीमा १८४ मत आवश्यक पर्दछ । ओली कांग्रेसको ८८ र एमालेको ७८ सांसद गरी कुल १६६ सांसदको समर्थनमा प्रधानमन्त्री बनेका हुन् । अहिले कांग्रेस र एमाले बाहेक ७ सांसद रहेको जसपा र ४ सांसद रहेको लोसपा सरकारमा गइसकेको छ ।
यसरी अहिले ओलीसँग १७७ मत सुरक्षित रहेको छ । अब दुई तिहाई मत पुर्याउन ओलीलाई थप ७ सिट आवश्यक पर्दछ । यता, माओवादी केन्द्र, रास्वपा र नेकपा (एकीकृत समाजवादी) ले ओलीलाई विश्वासको मत नदिने भएका छन् ।
अन्य समाचारहरु
