आश्विन २३ गते, २०८१ मा प्रकाशित
-गोपाल प्रसाद भट्टराई।
असौज–२३,अर्घाखाँची – अर्घाखाँचीको सन्धिखर्कमा सडक दुर्घटना न्युनिकरण लक्षित कृत्रिम घटना अभ्यासको डेमो प्रदर्शन गरिएको छ । मंगलबार तिनवटा सुरक्षा निकायको संयुक्त आयोजनामा सडक दुर्घटना हुँदा गरिने उद्दार कार्यको कृत्रिम घटना अभ्यास गरिएको हो ।
सन्धिखर्क नगरपालिकाको परिसर अगाडिको सडक खण्डमा जिल्ला प्रशासन कार्यालय, नेपाली सेना, सशस्त्र प्रहरी बल र नेपाल प्रहरी लगायतको समन्वयमा जिल्ला सुरक्षा समितिले कृत्रिम सवारी दुर्घटनाको घटना अभ्यास गरिएको प्रमुख जिल्ला अधिकारी बाबुराम अर्यालले जानकारी दिनुभयो ।
कृत्रिम घटना अभ्यासमा सवारी दुर्घटनामा परि बिच सडकमै लडिरहेका घाइतेलाई प्रहरीले रेस्क्यू गर्दा गरिने कार्यहरुलाई क्रमिक रुपमा डेमो प्रदर्शन गरिएको थियो ।
त्यस अवसरमा प्रमुख जिल्ला अधिकारी अर्यालले दुर्घटना जहाँ जतिबेला पनि हुन सक्ने भएकाले यात्रा गर्दा ध्यान पु¥याउन आम नागरिक समक्ष अपिल गर्नुभएको छ । दुर्घटना भइहालेमा प्रहरीले गर्ने उद्धार कार्य तथा सडकमा गुडिरहेका यातायातका साधन आपसमा ठक्कर खाँदा हुने दुर्घटना पछि पिडित पक्षबाट क्षतिपूर्तिको माग सहित हुने प्रदर्शनलाई कसरी शान्त पार्ने, घाइतेलाई उद्धार र उपचार कसरी गर्ने भन्ने बारेमा सचेत गराउन डेमो प्रदर्शन गरिएको जिल्ला प्रहरी कार्यालय अर्घाखाँचीका प्रमुख प्रहरी नायव उपरिक्षक चक्र बहादुर मल्लले बताउनु भएको छ ।
अहिलेको समयमा नेपालीहरुका ठुला पर्वहरु नजिकिएकाले गाउँघर तिर पर्व मनाउन आउनेको संख्या पनि बढ्ने भएकाले यस्तो समयमा दुर्घटनाको जोखिम बढी हुने प्र.ना.उ.मल्लको भनाई छ ।
दुर्घटना नहोस् भन्ने सचेतना तथा भइहालेमा गरिने उद्दार कार्यका विषयमा कृत्रिम घटना अभ्यासको नमुना प्रर्दशन गरिएको उहाँको तर्क छ ।
अन्य समाचारहरु
