जंगली हात्तीको आक्रमणबाट एकको मृत्यु

झापा ।  झापामा जंगली हात्तीको आक्रमणबाट एक व्यक्तिको मृत्यु भएको छ । गए राति करिब २ बजे दमक नगरपालिका–३ दीपज्योति टोलमा जंगलबाट आएको हात्तीले आक्रमण गर्दा स्थानीय ४५ वर्षीय मीनबहादुर भट्टराईको मृत्यु भएको हो ।

स्थानीय सुबिन भट्टराईको भान्सा घर भत्काउन लाग्दा धपाउन गएका भट्टराईलाई हात्तीले आक्रमण गरेको जिल्ला प्रहरी कार्यालय झापाका डीएसपी कृष्णकुमार चन्दले जानकारी दिए ।

हात्तीले भट्टराईलाई एक सय मिटर जति लखेटेर उचालेर पछार्दा उनको घटनास्थलमै मृत्यु भएको डीएसपी चन्दले जानकारी दिए । अहिले इलाका प्रहरी कार्यालय  दमकबाट प्रहरी टोली घटनास्थलमा पुगेको छ । झापाका विभिन्न क्षेत्रमा जंगली हात्तीले स्थानीयलाई वर्सेनी दुःख दिँदै आएको छ ।

-एनपी