मंसिर ३ गते, २०८१ मा प्रकाशित
काठमाडौं । पूर्वसभामुख दमननाथ ढुंगानाको राष्ट्रिय सम्मानका साथ पशुपति आर्यघाटमा अन्त्येष्टि गरिएको छ । ढुंगानाको पार्थिव शरीरमा दुई छोराले दागबत्ती दिएका छन् ।
सो अवसरमा नेपाली सेनाको टुकडीले सलामी अर्पण गरेको थियो । त्यसअघि ढुंगानाको पार्थिव शरीर श्रद्धाञ्जलीका लागि काठमाडौंको सानो गौचरनमा राखिएको थियो । सरकारी उच्च पदस्थ व्यक्तिहरु, राजनीतिक दलका नेतालगायत सानो गौचरन पुगेर श्रद्धाञ्जली अर्पण गरेका थिए ।
प्रधानमन्त्री केपी शर्मा ओली सानो गौचरन पुगेर ढुंगानाको पार्थिव शरिरमा राष्ट्रिय झन्डा ओढाएर श्रद्धाञ्जली अर्पण गरेका थिए । त्यस्तै नेपाली कांग्रेसका सभापति शेरबहादुर देउवाले ढुंगानाको पार्थिव शरीरमा पार्टीको झन्डा ओढाएका थिए ।
ढुंगानाप्रति श्रद्धाञ्जली अर्पण गर्न नेकपा माओवादी केन्द्रका अध्यक्ष पुष्पकमल दाहाल प्रचण्ड, नेकपा एकीकृत समाजवादीका अध्यक्ष माधवकुमार नेपालसहित विभिन्न राजनीतिक दलका शीर्ष नेता तथा कार्यकर्ताहरु पुगेका थिए ।
कलेजोसम्बन्धी समस्याबाट पीडित ढुंगानाको आइतबार उपचारको क्रममा निधन भएको हो । स्वर्गीय ढुंगानाका श्रीमती, दुई छोरा र एक छोरी छन् ।
अन्य समाचारहरु
