आइपीएल अक्सनको पहिलो दिन, ७२ खेलाडीका लागि ७४८.७२ करोड खर्च

मुम्बई, १० मंशिर । आईपीएल अक्सनको पहिलो दिन ७२ खेलाडीमा भारतीय ४६७.९५ करोड रुपैयाँ ( नेपाली रूपैयाँ ७४८.७२ करोड खर्च)  खर्च गरिएको छ ।

विकेट किपर ब्याट्सम्यान ऋषभ पन्त आईपीएल इतिहासकै सबैभन्दा महँगा खेलाडी बनेका छन र लिलामीको पहिलो दिन लखनऊ सुपर जाइन्ट्सले उनको लागि २७ करोड भारुको कीर्तिमानी बोली लगाएको छ ।

जहाँ पञ्जाब किंग्सले श्रेयस अय्यरलाई २६.७५ करोडमा किनेको थियो । यस्तो अवस्थामा अय्यर आईपीएल इतिहासकै दोस्रो महँगो खेलाडी बनेका छन् । यी दुई खेलाडीबाहेक वेंकटेश अय्यरलाई कोलकाता नाइट राइडर्सले २३.७५ करोडमा किनेको छ ।

वेंकटेश अय्यरको लागि यति ठूलो बोली कसैले नसोचेको भारतीय मिडियाले उल्लेख गरेका छन । युजवेन्द्र चहल र अर्शदीप सिंहलाई पनि १८ करोड भारुमा पञ्जाब टोलीमा समावेश गरिएको छ । चहल आईपीएल इतिहासकै सबैभन्दा महँगो स्पिनर बनेका छन् ।

लखनऊ र पञ्जाब दुवैलाई यस सिजन नयाँ कप्तानको आवश्यकता रहेको थियो र त पन्त र श्रेयसले यी भूमिकाहरू पूरा गर्न सक्ने उसले आशा देखाएको छ । दुवै खेलाडीले आईपीएल २०२४ को लिलामीमा मिचेल स्टार्कका लागि कोलकाता नाइट राइडर्सले गरेको २४.७५ करोड भारुको कीर्तिमानी बोलीलाई पनि पार गरेका छन्।

पहिलो दिनको लिलामीपछि रोयल च्यालेन्जर्स बैंग्लोरको पर्समा सबैभन्दा बढी पैसा छ । बेंगलुरुसँग यसको पर्समा ३०.६५ करोड रुपैयाँ बाँकी रहेको छ र तीनवटा आरटीएमहरू पनि अक्षुण्ण छन्। पहिलो दिन मुम्बई इन्डियन्सले सबैभन्दा कम खेलाडी किनेको छ ।

मुम्बईले ट्रेन्ट बोल्टसहित चार खेलाडी मात्रै किनेको छ, जो अहिलेसम्म एकमात्र विदेशी खेलाडी हुन् । सबैभन्दा धेरै पर्स लिएर लिलामीमा प्रवेश गरेको पञ्जाब किंग्सले अय्यर, चहल, अर्शदीप, म्याकवेल, बधेरा, व्याशाङ्कलगायतका खेलाडीमा धेरै पैसा खर्च गरेको छ ।