पौष १२ गते, २०८१ मा प्रकाशित
पोखरा– राष्ट्रिय स्वतन्त्र पार्टी (रास्वपा) का सभापति तथा निलम्बित सांसद रबि लामिछाने बयान सकिएको छ । जिल्ला अदालत कास्कीका न्यायाधीश नीतिज राईको इजलासमा बिहीबार र शुक्रबार लगातार रविको बयान भएको हो ।
सहकारी प्रकरणमा पक्राउ परेका रास्वपा सभापति लामिछानेको बयान शुक्रबार बिहानदेखि सुरु भएको थियो ।न्यायाधीश राईको इजलासमा पहिलो दिन बिहीबार दिउँसो रविसँग ३ घण्टा लामो बयान चलेको थियो ।
अदालतका सूचना अधिकारी सुरज अधिकारीका अनुसार लामिछानेको बाँकी बयान शुक्रबार सकिएको हो । रविको बयान सकिए पनि थुनछेक बहसलाई अझै समय लाग्ने भएको छ । अन्य आरोपीहरूको पनि बयान बाँकी रहेकाले थुनछेक बहसका लागि अझै समय लाग्ने भएको हो ।
उनलाई सोमबार र मंगलबार अदालतमा लगिए पनि पालो नआएका कारण बयान हुन सकेको थिएन । त्यहीबीचमा उनी संघीय सांसद पदबाट पनि रवि निलम्बन भइसकेका छन ।
सोमबार र मंगलबार गोर्खा मिडियाका पूर्वउपाध्यक्ष तथा पूर्वडीआईजी छविलाल जोशीसँग बयान सकिएको थियो । त्यसपछि अर्का प्रतिवादी लीला पछाईसँग बयान सुरु भएको थियो । जसका कारण यसअघि उनी अदालतमा गए पनि बयान दिन नपाएपछि यसै हिरासतमा फर्केका थिए ।
रविले दुई दिन लामो बयानका क्रममा सहकारी ठगीसहितका आरोपमा आफ्नो संलग्नता अस्वीकार गरेका छन् । उता सरकारी वकिलको कार्यालयमा पनि उनले आफ्नो संलग्नता अस्वीकार गरेका थिए ।
उनका साझेदार जोशीको पनि सहकारी ठगी, सम्पत्ति शुद्धीकरण र संगठित अपराधको मुद्दामा न्यायाधीश राईले अदालतमा लिएको बयान सकिएको छ ।
उनको मंगलबार बयान सकिएपछि अर्का प्रतिवादी लीला पछाईसँग सुरु गरिएको थियो ।
कास्की अदालतकोले सुनुवाइ सकिएपछि रवि लगायतलाई धरौटी वा साधारण तारेखमा छाड्ने वा पुर्पक्षमा पठाउने भन्नेबारे आदेश दिनेछ ।
सरकारी वकिलको कार्यालय, कास्कीले लामिछाने, छविलाल जोशीसहित ४४ जनालाई आइतबार सहकारी ठगीको आरोपमा प्रतिवादी बनाएर मुद्दा दर्ता गरेको छ ।
त्यही अभियोगमा ५ जनालाई बिगोअनुसारको सम्पत्ति जफत गर्ने प्रयोजनका लागि मात्र प्रतिवादी कायम गरिएको छ । रवि पक्राउ परेको ९२औँ दिनमा सरकारले आइतबार अभियोगपत्र दर्ता गरेको हो ।
लामिछानेविरुद्ध तीनवटा कसुरमा मुद्दा दर्ता भएको छ । लामिछानेविरुद्ध सङ्गठित अपराध, सहकारी ठगी र सम्पत्ति शुद्धीकरण सम्बन्धी कसुरमा अभियोग पत्र दर्ता गरिएको छ ।
गत शुक्रबार मात्रै यही घटनामा गोर्खा मिडियाका अध्यक्ष जीबी राईसहित १९ जनाविरुद्ध पूरक अभियोग पत्र दर्ता भएको थियो। १८ असोज, २०८० मा राई लगायतको समूहविरुद्ध मुद्दा दायर भएको थियो ।
प्रहरीले ६५ जनालाई प्रतिवादी कायम गर्न राय दिएपनि सरकारी वकिलको कार्यालयले भने प्रतिवादीको संख्या घटाएर मुद्दा दायर गरेको छ ।
लामिछाने सहित ४९ जनालाई सम्पत्ति शुद्धीकरण, सहकारी ठगी र सङ्गठित अपराध गरेको कसुरमा तथा जीवी राई र लीला पछाईंलाई राष्ट्रबैंक ऐन अन्तर्गतको कसुरमा पनि सजाय गर्न मागदाबी लिनुपर्ने राय दिएको थियो ।
रवि लामिछाने र जीवी राई सहितको समूहले सूर्यदर्शन सहकारीबाट १ अर्ब ५१ करोड अपचलन गरेको प्रहरीको अनुसन्धान निष्कर्ष छ ।
सुर्यदर्शनको ५ करोड ४८ लाख निक्षेप गोरखा मिडिया नेटवर्क प्रालिमा लगेर अपचलन गरेको भेटिएको प्रहरीको दाबी छ । सहकारीको बचत रकम अपचलन गरेको आरोपमा सभापति लामिछाने गत कात्तिक २ गते काठमाडौँबाट पक्राउ परेका थिए ।
अन्य समाचारहरु
