-गोपाल प्रसाद भट्टराई
माघ–०९,अर्घाखाँची
अर्घाखाँची –अर्घाखाँचीको भूमिकास्थान नगरपालिकाले सामुदायिक विद्यालयका ६५ जना शिक्षकका लागि बिशेष तालिम सुरु गरेको छ । सिकाई आपुरण तथा दु्रत सिकाई योजना कार्यान्वयनको निम्ती सहजीकरणका लागि भूमिकास्थान नगरपालिकाले यस्तो तालिम दिन थालेको हो ।
तालिममा कक्षा ३ देखि ८ कक्षा सम्मका ६५ जना बिषयगत शिक्षकहरुको सहभागिता रहेको छ ।
एउटा समूहमा ३३ र अर्को समुहमा ३२ जना गरि ६५ जना शिक्षकलाई दुई÷दुई दिनको तालिम दिइने भूमिकास्थानका शिक्षा शाखा प्रमुख तुवलाल सापकोटाले जानकारी दिनुभएको छ । नगर उप–प्रमुख बालकृष्ण बन्जाडे, प्रमुख प्रशासकिय अधिकृत जग्दीशचन्द्र नेपाली लगायतको बिशेष उपस्थितिमा तालिमको सुरुवात गरिएको शिक्षा शाखाका प्राविधिक सहायक नविन खड्काले बताउनुभएको छ ।
तालिमको समुद्घाटन नगरप्रमुख झविलाल थापाले गर्नुभएको हो । तालिमको उद्घाटन शत्रलाई सम्बोधन गर्दै नगरप्रमुख थापाले बालबालिकाको सर्वाङ्गीण विकासका लागि शिक्षकहरु वहुआयामिक हुनुपर्नेमा जोड दिनुभएको छ ।
“बालबालिकाले के चाहेका छन् ? उनीहरुको सिक्ने क्षमता र विधि कुन हो ? पहिचान गर्ने र रुचि अनुसारको बाटोमा लाग्ने वातावरण बनाइदिनुपर्छ ।” नगरप्रमुख थापाले भन्नुभयो,“ शिक्षकलाई दिएको तालिमको नतिजा हामीले विद्यार्थीहरुको प्रगतिमा मापन गर्नेछौँ ।
”उहाँले अगाडि थप्नुभयो, “यसकारण तालिम अवधिमा शिक्षक भएर होइन, विद्यार्थी भएर सहभागी हुनुहोला ।” तालिममा कक्षा ३,४ र ५ को नेपाली र गणित तथा कक्षा ६,७ र ८ को नेपाली, गणित, अंग्रेजी र विज्ञान बिषयको सिकाईको स्तरवृद्धि केन्द्रित तालिम प्रदान गरिने भूमिकास्थान नगरपालिकाले जनाएको छ ।
तालिम पश्चात परिक्षा गराएर तालिम दिइएका बिषयमा ७० प्रतिशत भन्दा कम अंक ल्याउने विद्यालयका विद्यार्थिलाई थप कक्षा व्यवस्थापन गरि सिकाइ योजना बनाइने नगर शिक्षा शाखा प्रमुख तुवलाल सापकोटाको भनाई छ ।
पहिलो ३३ जना शिक्षकको दुई दिने तालिम मंगलबार सकिएको छ भने बुधबारबाट सुरु भएको दोस्रो समुहमा सहभागी ३२ जना शिक्षकको तालिम बिहिबार सकिने छ ।
माघ १० गते, २०८१ मा प्रकाशित
