-गोपाल प्रसाद भट्टराई
माघ–११,अर्घाखाँची
अर्घाखाँची – प्रथम अर्घाखाँची डोरीतान प्रतियोगिताको उपाधि भूमिकास्थानको फलामखिल्ली युथ क्लवले हात पारेको छ । जिल्ला डोरीतान संघ अर्घाखाँचीको आयोजना र सन्धिखर्क नगरपालिकाको सहयोगमा बिहिबार सम्पन्न प्रतियोगितामा सहभागी १० टिमलाई पछि पार्दै फलामखिल्ली युथ क्लवले उपाधि उचालेको हो ।
प्रतियोगितामा मालारानी गाउँपालिका दोस्रो र भूमिकास्थान– ५ र ६ को संयुक्त टोलीले तेस्रो स्थान हाँसिल गरेका छन् । प्रतियोगिताको विजेता टोली फलाम खिल्ली युथ क्लवले नगद रु.१५ हजार, दोस्रो हुने मालारानी गाउँपालिकाले नगद रु. १० हजार र तेस्रो हुने भूमिकास्थान– ५ र ६ को संयुक्त टोलीले नगद रु. ५ हजार सहित प्रमाणपत्र पुरस्कार प्राप्त गरेका छन् ।
प्रतियोगिताका विजयी खेलाडीलाई पुरस्कारले सम्मान गर्दै सन्धिखर्क नगरप्रमुख कृष्ण प्रसाद श्रेष्ठले डोरीतान खेल प्राचिन खेल भएकोले यसको संरक्षण गर्न र पुस्तान्तरण गर्न खेल आयोजना गरिएको बताउनुभयो । प्रतियोगितालाई भव्य बनाउन सहयोग गर्ने जिल्लाका अन्य पालिका तथा सरोकारवालालाई नगरप्रमुख श्रेष्ठले धन्यवाद व्यक्त गर्नुभएको छ ।
खेल क्षेत्रको विकासका निम्ती आफुहरु सदैव साथमा रहेकोपनि नगरप्रमुख श्रेष्ठको भनाई रहेको छ । प्रतियोगिताको उद्घाटन शत्रमा भूमिकास्थान नगरप्रमुख झविलाल थापा, सन्धिखर्क नगर उपप्रमुख मिश्रा आचार्य, प्रमुख जिल्ला अधिकारी बाबुराम पौडेल, डिएसपी चक्र बहादुर मल्ल, सशस्त्र प्रहरी बल अर्घाखाँचीका डिएसपी भिमसेन बोहोरा लगायतको आतिथ्यता रहेको थियो ।
माघ १२ गते, २०८१ मा प्रकाशित
