

-गोपाल प्रसाद भट्टराई
माघ–१७,अर्घाखाँची ।
अर्घाखाँची ; “सुरु–सुरुमा त हामी अनुगमनमा जाँदा पसलेहरु ढोका लाएर हिड्ने गर्नुहुन्थ्यो, अहिले व्यवसायी र उपभोक्ता दुवै सचेत हुंदै जानुभएको छ ।” नगरस्तरिय बजार अनुगमन टोलिका संयोजक तथा निरिक्षण अधिकृत शंकर अधिकारीले भन्नुभयो ।
नगरपालिकाबाट नियमित अनुगमन, सूचना सम्प्रेषण र सचेतनामुलक अभियान संचालन गर्न थालेपछि अहिले आफ्नो व्यवसाय दर्ता गर्ने, सामानको लेभलिङ्ग जाँच गर्ने र राज्यलाई कर तिर्ने कुरामा समेत व्यवसायिहरु अग्रसर बन्न थाल्नुभएको भूमिकास्थान नगरपालिकाका नगर प्रमुख झविलाल थापाको भनाई छ ।
व्यबसायिले मात्रै नभएर अहिले उपभोक्ताले समेत दैनिक उपभोग्य बस्तुमा हुनुपर्ने लेभलको जाँच गरेर प्रयोग गर्नेहरुको संख्या बढ्न थालेको नगर प्रमुख थापाको भनाई छ ।
उपभोग्य वस्तुमा उत्पादन मिति, एक्सपायर मिति र बिक्री मुल्य जस्ता लेभल हेरेर खरिद बिक्रि गर्ने, कानुनी मापदण्ड अनुसार व्यवसाय दर्ता गर्ने र राज्यलाई कर तिर्ने बानीको विकास भएको देख्दा आफुलाई निकै खुशी लागेको भूमिकास्थान नगर उप–प्रमुख बालकृष्ण बन्जाडेले बताउनुभयो ।
चालु आर्थिक बर्ष २०८१÷०८२ को ६ महिनामा मात्रै पालिकाका विभिन्न वडामा १० पटक बजार अनुगमन गरि सकिएको र जसबाट अघिल्ला बर्षहरुमा भन्दा व्यवसायी र उपभोक्तामा सचेतना बढेको पाइएको प्रमुख प्रशासकिय अधिकृत जग्दीश चन्द्र नेपालीको भनाई छ । ब्यापार, व्यवसायमा गुणस्तरिय सेवा र वैद्यता प्रदान गर्नाले पालिकाको आन्तरिक आयमा वृद्धि हुने र नागरिकको स्वास्थ्यमा समेत सुधार आउने प्रमुख प्रशासकिय अधिकृत नेपालीको विस्वास छ ।
भूमिकास्थानको ढाकावाङ्ग, धारापानी, असुरकोट, खिल्जी र ढिकुराका विभिन्न स्थानमा बजार अनुगमन गरिसकेको भूमिकास्थानले मंगलबार भूमिकास्थान–१ को राजिमे, साम्नेगाउँ र सिटेनीमा अनुगमन गरेको छ ।
अनुगमन टोली संयोजक अधिकारीको नेतृत्वमा, योजनाशाखा प्रमुख हरिश्चन्द्र भुसाल, लेखाशाखा प्रमुख जुना पाण्डे, पशुसेवा शाखाका पशु प्राविधिक बलराम खनाल, राजश्व शाखा प्रमुख जगत प्रसाद भुसाल,पत्रकार गोपाल प्रसाद भट्टराई र ढाकावाङ्ग प्रहरी चौकीको प्रहरी टोलीले ति भूमिकास्थानका २० वटा बढि पसलहरुमा अनुगमन गरेको हो ।
अनुगमन गर्दा केही पसलहरुमा मुल्यसुची नभएको, केही ब्यवसायीहरुले पसल दर्ता नगरेको, दर्ता अनुसारको सेवा प्रवाह नगरेको, नविकरण नगरेको, बोर्ड तथा मुल्यसुची नराखेको पाइएको टोली संयोजक शंकर अधिकारीको भनाइ छ ।
दर्ता नभएका र नविकरण नगरेका पसलेहरुलाइ ३५ दिनभित्रमा नगरपालिकामा गइ पसल दर्ता र नविकरण गर्न निर्देशन गरिएको अनुगमन टोलिले बताएको छ । ढाकावाङ्गमा मंगलबार गरिएको बजार अनुगमनमा कुनैपनि पसलमा म्याद नाघेका र अखाद्य वस्तु नभेटिएको पाइएको छ ।