अर्घाखाँची स्थित गच्छेघाटमा नुहाउने पानीको अभाव: क्रियापुत्रीहरू समस्यामा (तस्बिर सहित)

-बसन्त बहादुर खड्का ,अर्घाखाची डट्कम।

गच्छेघाट,अर्घाखाँची – अर्घाखाँचीको सन्धिखर्क नगरपालिका–७ स्थित गच्छेघाटमा अन्तिम संस्कारका लागि आउनेहरू नुहाउने पानीको अभावमा समस्यामा परेका छन्।

सदरमुकाम नजिकै रहेको र आसपासका गाउँबाट समेत शव दाहसंस्कार गर्न यही घाट प्रयोग गरिने भएकाले यहाँ दैनिक रूपमा अन्तिम संस्कार भइरहन्छ। तर यहाँ आएका क्रियापुत्री र सहभागीहरूका लागि सफा पानीको अभाव ठूलो चुनौती बनेको छ।

गच्छेघाटमा जाने बाटो, बस्नका लागि पौवा, बत्ती, शौचालय जस्ता सुविधा उपलब्ध भए पनि नुहाउने पानीको उचित व्यवस्था छैन।

घाटको छेउमै बागी खोला बग्दछ, तर उक्त खोलाको पानी सफा छैन। सन्धिखर्क बजार क्षेत्रको ढल मिसिने भएकाले पानी दुर्गन्धित छ, जसका कारण प्रयोग गर्न असम्भव छ। बर्खामा खोलामा बाढी आउने हुँदा पानी धमिलो हुन्छ भने हिउँदमा पानी अत्यधिक प्रदूषित हुन्छ।

स्थानीयवासीको माग: शुद्ध पानीको धारा जडान होस्

यो समस्या दीर्घकालीन रूपमा समाधान गर्न स्थानीयवासीहरूले घाट नजिकै पाइपलाइनमार्फत सफा पानीको धारा जडान गर्न माग गरेका छन्। घाटमा दिनहुँ शव दाहसंस्कार भइरहने भएकाले यहाँ आउने मानिसहरूका लागि शुद्ध पानीको व्यवस्था गर्नु नगरपालिकाको जिम्मेवारी रहेको उनीहरू बताउँछन्।

सम्बन्धित निकायको ध्यान कहिले जाने?

गच्छेघाटलाई व्यवस्थित बनाउन अन्य भौतिक संरचना निर्माण भए पनि पानीको अभावकै कारण यहाँ आउने क्रियापुत्रीहरूले थप समस्या झेल्नु परेको छ। स्थानीय सरकार र सम्बन्धित निकायहरूले यो विषयलाई गम्भीर रूपमा लिएर समाधान खोज्नुपर्ने देखिन्छ।