चैत्र १८ गते, २०८१ मा प्रकाशित
-केशब पन्थि।
सन्धिखर्क ,अर्घाखाँची – नेकपा (एमाले) सडक प्रदर्शनमा उत्रिएको छ । गणतन्त्र खतरामा परेको भन्दै सरकारवादी दलनै सडक प्रदर्शनमा उत्रिएको हो ।
सदरमुकाम सन्धिखर्कमा भएको प्रदर्शनमा नेकपा (एमाले) का नेता तथा कार्यकर्ताले ‘सङ्घीय लोकतान्त्रिक गणतन्त्र जिन्दाबाद’ ‘प्रतिगामी षड्यन्त्र मुर्दावाद’ ‘राष्ट्रिय स्वाधीनताको रक्षा गरौँ’ ‘व्यवस्था विरोधी तत्त्व होसियार’ लगायतका नारा लगाएका थिए ।
नेकपा एमाले जिल्ला कार्यसमितिले आयोजना गरेको ‘जनप्रदर्शन तथा जागरण सभा’ मा चार हजार नेता कार्यकर्ता सहभागी भएको जिल्ला अध्यक्ष पिताम्बर भुसालले बताउनु भएको छ। प्रतिगामी षड्यन्त्र र अराजकताको विरुद्ध तथा लोकतान्त्रिक गणतन्त्रका पक्षमा प्रदर्शन मार्फत खबरदारी गरिएको उहाँको भनाई छ ।
एमालेले सबै जिल्ला सदरमुकाममा र्याली र प्रदर्शन गर्न सर्कुलर गर्न जारी गरेपछि अर्घाखाँचीमा पनि कार्यक्रमको आयोजना गरिएको एमाले अर्घाखाँचीले जनाएको छ । कार्यक्रमलाई सम्बोधन गर्दै नेकपा एमालेका केन्द्रिय सदस्य बोम बहादुर विकले कुनै एक व्यक्ती वा वंशले शासन गर्ने युग पहिल्यै समाप्त भईसकेपनि केही तत्त्वहरू षड्यन्त्र गर्न लागिपरेको बताउनु भएको छ।
एमालेका प्रदेश सचिवालय सदस्य तथा प्रदेश सांसद रामजी प्रसाद घिमिरेले नेकपा एमालेले राष्ट्रलाई बन्धन बनाउने कुनैपनि षड्यन्त्र सफल हुन नदिने बताए । कार्यक्रममा एमालेका प्रदेश तथा जिल्ला स्तरका नेता तथा कार्यकर्ताको बाक्लो उपस्थिति रहेको थियो ।
थप तस्बिर :
अन्य समाचारहरु
