‘दुईटा चोर मिलेर साधु हुँदैन : ’गणतन्त्र ओली र देउवा तन्त्र हैन, गणतन्त्र जनताको तन्त्र हो र त्यो झन्डा हामी बोक्छौँ: रवि लामिछाने

काठमाडौं । राष्ट्रिय स्वतन्त्र पार्टीका सभापति रवि लामिछानेले गणतन्त्रको खोलमात्रै ओढेका दलहरूसँग फोटो खिचाउने पक्षमा आफ्नो दल नरहेको बताएका छन् ।

पार्टी केन्द्रीय समितिको बैठक अघि केन्द्रीय कार्यालय वनस्थलीमा बोल्ने क्रममा सभापति लामिछानेले गणतन्त्रवादी भन्ने दलहरूले गणतन्त्रको खोल मात्रै ओढेको र उनीहरु गणतन्त्रवादी नभएको बताए ।

‘जहाँ तपाईं उभिरहनु भएको छ । त्यो गणतन्त्र नभएर लुटतन्त्रको खोल ओडिरहनुभएको छ । रास्वपाले खोल ओड्दैन,’ लामिछानेले भने, ‘तपाईंको कर्तुत लुकाउन लागि तपाईंको कित्तामा उभिएर फोटो खिचाउने रहर रास्वपालाई छैन ।’

लामिछानेले गणतन्त्र भनेको जनताको शासन व्यवस्था भएकोले त्यसको झण्डा आफूहरुले बोक्ने बताए । ‘गणतन्त्र भनेको ओली तन्त्र र देउवा तन्त्र हैन। गणतन्त्र भनेको जनताको तन्त्र हो र त्यो झन्डा हामीले बोक्छौँ ।’ लामिछानेले भने, हामी गणतन्त्रवादीको कित्तामा छैनौ कि, गणतन्त्रवादी होइनौं कि भनेर हिलो छ्याप्ने प्रयास भएको छ । म भन्न चाहन्छु, जहाँ तपाईं उभिनुभएको छ, त्यो गणतन्त्र होइन । तपाईंले गणतन्त्रको खोल ओढ्नु भएको थियो । रास्वपा खोल ओढ्दैन ।’

वर्तमान सरकारप्रति आक्रोशित लामिछानेले नेपाली कांग्रेस र नेकपा एमाले प्रति लक्षित गर्दै भने ‘दुईटा चोर मिलेर साधु हुँदैन ।’