चैत्र २७ गते, २०८१ मा प्रकाशित
काठमाडौं । नेपाली कांग्रेसका महामन्त्री गगन थापाले प्रधानमन्त्री केपी शर्मा ओलीलाई उद्घाटन र भाषणमा समय खेर नफालेर काम गर्न सुझाव दिएका छन् ।
रुपन्देहीको देवदहमा पार्टीले बुधबार गरेको कार्यक्रमलाई सम्बोधन गर्दै महामन्त्री थापाले प्रधानमन्त्री ओली उद्घाटन र भाषणका लागि डुल्ने–घुम्ने काममा भुल्दा सरकारको कामको गति कम भएको बताए ।
सरकारको कामको गति नपुगेको भन्दै उनले युद्धको मनोविज्ञान लिएर काम गर्न प्रधानमन्त्री–मन्त्रीहरूलाई सुझाव दिए ।
‘सरकारको कामको गति पुगेन । हामी भन्छौं सरकारलाई– तिमी युद्धको मनोविज्ञानले काम गर । १८ घण्टा काम गर, २० घण्टा काम गर, उद्घाटनमा नजाऔ । काहीँ भाषण गर्न नजाऔ,’ महामन्त्री थापाले भने, ‘प्रधानमन्त्री अहिले डुलेको देख्छु, मन्त्रीहरू घुमेको देख्छु, मेरो सम्मानपूर्वक उहाँहरूलाई अनुरोध छ, तपाईंहरू डुल्ने–घुम्ने काम छाड्नुस् । तपाईंहरू काम गर्नुस् । त्यो कामको प्रचारप्रसार गर्ने काम हामीहरू गरिहाल्छौं ।’
शिक्षकका माग ठिक ढंगले माग सम्बोधन गर्न पनि उनले आग्रह गरे । -SP
अन्य समाचारहरु
