बैशाख १ गते, २०८२ मा प्रकाशित
काठमाडौं । नेकपा एमालेले वर्तमान सरकार परिवर्तनको कुनै पनि सम्भावना नरहेको निष्कर्ष निकालेको छ ।
केन्द्रीय कार्यालय च्यासलमा बसेको सचिवालय बैठकले सरकार परिवर्तनको हल्लामा सत्यता नरहेको निष्कर्ष निकालेको हो । बैठकपछि एमाले उपमहासचिव प्रदीप ज्ञवालीले सरकार परिवर्तनको संभावना र औचित्य दुवै नभएको बताए ।
‘माओवादी केन्द्रका अध्यक्ष प्रचण्डले फेरि सरकार परिवर्तनको हल्लाहरु गरिरहनुभएको छ । यसले उहाँमा सरकारबाहिर रहँदाको एक खालको कुण्ठा, एकखालको पीडाबोध प्रकट हुन्छ,’ बैठकका निर्णय सुनाउँदै उपमहासचिव प्रदीप ज्ञवालीले भने, ‘अहिले सरकार परिवर्तन न कतैबाट संभव छ, न त्यसको सान्दर्भिकता छ, न औचित्य छ ।’
तर सत्ता मोहका कारण प्रचण्डले सरकार परिवर्तनको हल्ला गरिररहेको ज्ञवालीले आरोप लगाए ।
‘राष्ट्रिय राजनीतिका यावत कुरा छोडेर सरकार परिवर्तनको कुरा मात्रै गर्नु भनेको सत्ताप्रतिको आशक्ति, सत्ता मोहबाहेक अर्थोक केही पनि होइन । त्यसले भ्रम सिर्जना गर्ने कोसिस भएको छ । त्यसलाई पनि खण्डन गरेका छौं’, ज्ञवालीले भने ।
प्रचण्डले शनिवारमात्रै चितवनमा पत्रकारसँग नयाँ वर्षमा कांग्रेसको नेतृत्वमा नयाँ सरकार बन्ने बताएका थिए । उनले आफूले त्यस्तो आधार पाएर बोलेको समेत दाबी गरेपछि एमालेले त्यसको खण्डन गरेको छ ।
अन्य समाचारहरु
