-गोपाल प्रसाद भट्टराई,अर्घाखाँची।

भुमिकास्थान-अर्घाखाँचीको भुमिकास्थान नगरपालिका स्तरीय छैठौं राष्ट्रपति रनिङ शिल्ड प्रतियोगिताको उपाधि भुमिकास्थान–७ को भगवती मा.वि.ले जितेको छ ।

मंगलबार सम्पन्न प्रतियोगितामा ८ स्वर्ण सहित १७ पदक जित्दै भगवती मा.वि.ले उपाधि चुमेको हो ।

भगवती मा.वि.ले ५ रजत र ४ कास्य पदक जितेको छ । यस्तै ८ स्वर्ण, ४ रजत र २ कास्य सहित १४ पदक जित्दै जनप्रिय मा.वि. भुमिकास्थान–५,असुरकोट दोस्रो र २ स्वर्ण, ७ रजत र १ कास्य सहित १० पदक जितेको शान्ति मा.वि. भुमिकास्थान–४,धारापानी तेस्रो भएका छन्।

साविक विजेता नुवाकोट माध्यमिक विद्यालयले भने २ स्वर्ण, १ रजत र ४ कास्यसहित ७ पदकमा चित्त बुझाएको छ ।

प्रतियोगिता अन्तरगत छात्र भलिवल भगवती माध्यमिक विद्यालय भुमिकास्थान–९,डेभा र छात्रा भलिबल जनप्रिय मा.वि.भुमिकास्थान ५,असुरकोटले जितेको छ ।

छात्र भलिवलमा जनजागृती मा.वि.भुमिकास्थान–१०, धनचौर द्धितिय र प्रभावकर मा.वि.भुमिकास्थान–३,धारापानी तृतिय भएका छन् ।

यस्तै छात्रा भलिवलमा जनजागृती मा.वि.भुमिकास्थान–१०, धनचौर द्धितिय र शान्ति मा.वि.भुमिकास्थान–४,धारापानी तृतिय भएका छन् ।

त्यस्तै छात्रा तर्फको कबड्डीमा जनप्रिय मा.वि.भुमिकास्थान–५,असुरकोटले स्वर्ण, अन्नपूर्ण मा.वि.भुमिकास्थान–३ धारापानीले रजत र नुवाकोट मा.वि.भुमिकास्थान–८ चिदिचौरले कास्य पदक जितेका छन् ।

प्रतियोगिताको विजेता भुमिकास्थान–७ को भगवती मा.वि.लाई शिल्ड,ट्रफि र प्रमाणपत्र, उपविजेता जनप्रिय मा.वि.असुरकोट र तृतिय स्थानको शान्ति मा.वि.धारापानीलाई ट्रफि र प्रमाणपत्रले सम्मान गरिएको नगर शिक्षा प्राविधिक सहायक नविन खड्काले जानकारी दिनुभएको छ ।

प्रतियोगितामा १३ विद्यालयले सहभागिता जनाएको नगरशिक्षा शाखाले जनाएको छ ।

३ दिनसम्म चलेको प्रतियोगितामा १५ इभेन्टमा ३० स्वर्ण, ३० रजत र ३१ कास्य गरी ९१ पदकका लागि ३ सय ३९ जना विद्यार्थीले प्रतिस्पर्धा गरेको नगर शिक्षा अधिकारी तुवलाल सापकोटाले बताउनुभएको छ ।

नगरपालिका स्तरीय प्रतियोगिताको विभिन्न खेलमा सहभागी विद्यार्थीबाट उत्कृष्ट खेलाडी छनोट गरेर २०८० माघ १४ गतेदेखि सुरु हुने १३ औं जिल्ला स्तरीय राष्ट्रपति रनिङशिल्ड प्रतियोगितामा सहभागी गराइने भुमिकास्थान नगरपालिकाका नगरप्रमुख झविलाल थापाको भनाई छ ।