आषाढ़ ४ गते, २०८१ मा प्रकाशित
काठमाडौं । चालु आर्थिक वर्षको ११ महिनामा श्रम स्वीकृति लिएर वैदेशिक रोजगारीमा जानेको संख्या ६ लाख ८२ हजार पुगेको छ । वैदेशिक रोजगार विभागका अनुसार चालु आव २०८०/८१ को साउनदेखि जेठ मसान्तसम्म ६ लाख ८२ हजार ३८६ जना नेपाली रोजगारीको लागि विदेश गएका छन् ।
जेठमा मात्र ७२ हजार ६ सय ८१ जना रोजगारीको खोजीमा विदेश गएका छन् । जसमा ६४ हजार ८ सय ८६ पुरुष र ७ हजार ९ सय ७५ महिला छन् । वैशाखमा ७० हजार व्यक्ति विदेशिएका थिए ।
गत आर्थिक वर्ष २०७९र८० मा वैदेशिक रोजगारीमा जानेको संख्या ७ लाख ७१ हजार पुगेको थियो । चालु आव २०८०/८१ मा पनि साउनसम्म वैदेशिक रोजगारीमा जानेको संख्या साढे सात लाख पुग्ने देखिन्छ ।
वैदेशिक रोजगारीको लागि सबैभन्दा धेरै यूएई गएका छन् । चालु आर्थिक वर्षको जेठ मसान्तसम्म यूएईका लागि १ लाख ७४ हजार ९१७ जनाले श्रम स्वीकृति लिएका विभागका निर्देशक एवं सूचना अधिकारी गुरुदत्त सुवेदीले जानकारी दिए । मलेसियामा भने ८७ हजार जना गएका छन् ।
जेठमा मात्र २० हजार ४२४ जना यूएई गएका छन् भने मेलेसियामा ८ हजार ७५२ जना पुगेका छन् । यस्तै, कतारमा ११ हजार ९७३, साउदी अरबमा १३ हजार ३६६ र कुवेतमा ३ हजार ४३२ जना रोजगारीका लागि पुगेका छन् ।
पछिल्लो वर्षमा वैदेशिक रोजगारीको लागि युरोप जानेको संख्या पनि बढ्दै गएको ।जेठ महिनामा क्रोएसियामा २ हजार ९२२ जना, रोमानियामा १ हजार ९४६ जना, साइप्रसमा ८९९, माल्टामा २८१ र प्रोचुगलमा १३९ जना रोजगारीका लागि पुगेका छन् ।
अन्य समाचारहरु
