भाद्र १५ गते, २०८१ मा प्रकाशित
काठमाडौं– प्रधानमन्त्री केपी शर्मा ओलीले आधा शताब्दीभन्दा बढी समयदेखि देश बनाउने अभियानमा लागेका कारण आफूलाई पशुपति जलहरीजस्ता विभिन्न प्रकरणमा झुटा आरोप लगाउने गरिएको तर्क गरेका छन् ।
शनिबार काठमाडौंमा क्याप्टेन रामेश्वर थापाको पुस्तक ‘इन्टु द फायर’ बिमोचन गर्दै प्रधानमन्त्री ओलीले लोकतन्त्रविरुद्ध आवाज उठाउनेहरू नै अहिले ठूलो कुरा गरिरहेको आरोप समेत लगाए ।
केही दिनअघि पूर्वप्रधानमन्त्री एवम् प्रमुख प्रतिपक्षी नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले दुई तिहाइको घमण्ड देखाए सरकारले बङ्गलादेश र श्रीलङ्काको हालत ब्यहोर्नुपर्ने चेतावनी दिएका थिए । दाहालको सो अभिव्यक्तिप्रति पनि ओलीले कटाक्ष गरे ।
‘श्रीलङ्का र बङ्गलादेशबाट सिक’ भनेर प्रचण्डले अर्ती उपदेश दिएको भन्दै ओलीले आफूले १७ हजार मान्छे नमारेको कारण खुट्टा नकमाउने बताए । नेपाल कुनै देशको फोटोकपी मेसिन नभएको पनि ओलीको भनाइ थियो ।
अब नेपालमा कुनै पनि किसिमको हिंसा सम्भव नभएको दाबी गर्दै प्रधानमन्त्री ओलीले नेपाल श्रीलङ्का र बङ्गलादेश जस्तै हुनसक्ने धम्कीबाट आफू नडराउने दोहोर्याए । ओलीले राजनीति र राज्य व्यवस्थालाई घृणा गर्ने भन्ने कुरा सामाजिक अराजकतामात्रै भएको र यसले समाजलाई बेथितितर्फ लाने धारणा राखे । प्रधानमन्त्री ओलीले लोकतान्त्रिक शासन प्रणालीमा अरूको अधिकार हनन् हुने गरी हुने कुनै पनि गतिविधि वा अराजकतालाई राज्यले कानुनी रूपमा रोक्ने पनि उल्लेख गरे ।
सत्ता गठजोडको प्रमुख घटक नेपाली कांग्रेसलाई पनि ओलीले सत्ताको नेतृत्व आलोपालो गर्ने सन्दर्भमा थप विश्वस्त बनाउन खोजे । आफूलाई पदको कुनै लोभ नभएको पनि जिकिर गर्दै उनले आफ्नो कार्यकाल सकिनुअघि नै सहज रूपमा कांग्रेसलाई सत्ता हस्तान्तरण गर्ने बताए ।
-एनपी
अन्य समाचारहरु
