एनपिएल : न्युजिल्यान्डका गप्टिल बने एनपिएलमा अर्धसतक बनाउने पहिलो खेलाडी

न्युजिल्यान्डका अनुभवी ब्याटरले अर्धसतक बनाउँदा विराटनगरले १२.१ ओभरमा ८३–३ को अवस्थामा छ । यसअघि जनकपुरका ललितनारायण राजवंशी पहिलो विकेट लिने खेलाडी बनेको थिए ।

शनिबार भएको उद्घाटन खेलमा जनकपुर बोल्ट्सका ललितले विराटनगरका लोकेश बमको विकेट लिएका हुन् । उनले दोस्रो ओभरको पहिलो बलमै विकेट लिएका थिए । लोकेश र मार्टिन गुप्टिल क्रिजमा आएका थिए । यसअघि जनकपुरले टस जितेर बलिङ गरेको थियो । शनिबार टस हारेको विराटनगर किंग्सले सुरुमा ब्याटिङ गरेको छ । यसअघि प्रतियोगिताको उद्घाटन युवा तथा खेलकुद मन्त्री तेजुलाल चौधरीले गरेका छन् ।

यसअघि राष्ट्रपति रामचन्द्र पौडेलले उद्घाटन गर्ने भनेपनि अन्तिममा नाम फिर्ता भएको थियो । त्यसपछि खेलकुद मन्त्री तेजुलाल चौधरीले उद्घाटन गरेका हुन् । राष्ट्रिय खेलकुद परिषद् (राखेप) सदस्य सचिव टंकलाल घिसिङसहित क्यानका पदाधिकारीको उपस्थिति रहेको थियो ।

उद्घाटनसत्र अघि कर्णाली याक्समा अनुबन्ध भएका भारतीय चर्चित खेलाडी शिखर धवनले मैदान परिक्रमा गर्दै नेपाली समर्थकको अभिवादन स्विकार गरेका थिए । ८ टिमबीच हुने एनपिएलको समापन ६ पुसमा हुनेछ । नेपाल क्रिकेट संघ (क्यान)ले विजेताले १ करोड ११ लाख पाउँदा उपविजेताले ५५ लाख पाउने जनाएको छ । त्यस्तै, तेस्रोले ३० लाख र चौथोले २० लाख पाउने छन् ।