सिरियाको बन्दरगाह शहर लाताकियामा नौसेना परिचालन गरी प्रदर्शनकारीमाथि आक्रमण शुरु गरेपछि त्यहां रहेका हजारौ प्यालेष्टाइनी शरणार्थी शिविर छाड्न बाध्य भएका छन् ।
संयुक्त राष्ट्रसंघका अनुसार ५ देखी १० हजार शरणार्थी युद्धको चपेटामा परिने डरले लाताकियाबाट पलायन भैरहेका छन् । उनीहरुलाई सुरक्षित मार्गको आवश्यकता भएको जनाएको छ । राष्ट्रसंघिय सहयोग निकायले चार जनाको मृत्यु भएको जनाएको छ ।
प्यालेष्टाइनी अधिकारीहरुले सिरिया सरकारसंग प्यालेष्टाइनी शरणार्थीको जीवन रक्षाको लागि आग्रह गरेको छ । यता लाताकिया शहरमा सिरियाली सेनाको तिन दिने सैन्य अपरेशनका क्रममा ३० भन्दा बढी मानिस मारिएका छन् । यसैबीच सिरियासंग नजिकको सम्बन्ध रहदै आएको टर्कीले प्रदर्शनकारीमाथि तत्काल र विना शर्त दमन रोक्न फेरि पनि आग्रह गरेको छ ।
सिरियामा राष्ट्रपति बशार अल असादको सत्ता विरुद्ध गत मार्च यता भैरहेको प्रदर्शनमा १७ सय भन्दा बढि मारिएको मानव अधिकारवादी संगठनहरुले जनाएका छन् ।
श्रावण ३१ गते, २०६८ मा प्रकाशित
