लिवियामा विद्रोहीबाट लुक्दै भागिरहेका कर्णेल गद्धाफीको खोजी तीव्र भैरहेका बेला उनको गढ मानिने बनी वलीद शहर विद्रोहीहरुको नियन्त्रण नजिक पुगेको छ । गद्धाफीको सेनाको नियन्त्रणमा रहेको चार शहर मध्ये बनी वलीद शहर पनि एक हो । शहर प्रवेशका क्रममा विद्रोही सेनाले कडा प्रतिरोधको सामना गर्नु परेको बताइएको छ । संघर्षका क्रममा चार जनाको मृत्यु भएको र केही घाइते भएको जनाइएको छन् ।
गद्धाफीका सेनालाई शनिवार सम्म हतियार बुझाउन दिएको समयसीमा सकिए लगतै वलीद शहर विद्रोहीको निशानामा परेको हो । उता गद्धाफीको गृहनगर सिर्तमा पनि भीषण संघर्ष भैरहेको छ ।
यसैबीच इन्टरपोलले गद्धाफी, उनका छोरा सेफ अल इस्लाम र पूर्व लिवियाली गुप्तचर निर्देशक अब्दुल्ल अल सेनुसी विरुद्ध रेड कर्नर नोटिस जारी गरेको छ ।
उता संयुक्त राष्ट्रसंघका महासचिव बान कि मुनले लिवियामा चुनावको व्यवस्था, न्यायिक प्रणाली र प्रहरी संगठनलाई प्रभावकारी रुपमा विकास गर्न लिवियामा नयां मिसन स्थापनाका लागि सुरक्षा परिषद्लाई आग्रह गर्नुभएको छ ।
भाद्र २४ गते, २०६८ मा प्रकाशित
