अफ्रिकी मुलुक सेनेगलमा राष्ट्रपति अब्दुलाए वादेलाई तेस्रो पटक पनि राष्ट्रपति पदको चुनावमा उम्मेदवार हुन संवैधानिक अदालतले स्वीकृति दिएपछि देश भर हिंसा भड्किएको छ ।
घटनामा एक जना प्रहरी मारिएका छन् । राजधानी डकारमा घरहरुमा व्यापक आगजनी र तोडफोड भएको छ । काउल्याक शहरमा वादेको पार्टीको मुख्यालय प्रदर्शनकारीहरुले जलाएका छन् । सरकारले प्रदर्शनमा प्रतिबन्ध लगाए पनि विभिन्न शहरमा सुरक्षाकर्मी र प्रदर्शनकारीबीच व्यापक झडप भएका छन् ।
विपक्षीहरुले तेस्रो कार्यकालका लागि पनि वादेलाई चुनावमा भाग लिन अनुमति दिएमा सडक प्रदर्शन गर्ने चेतावनी दिएका थिए । यता सन् २००० देखी सत्तामा रहेका ८५ वर्षिय राष्ट्रपति वादेले संयम अपनाउन अपील गरेका छन् । उनले फेब्रअरी २६ मा हुने चुनाव निष्पक्ष हुने दाबी पनि गरे ।
प्रमुख विपक्षी नेता एवं चर्चित संगितकार युस्सु नदाउरले अदालतले आफ्नो नामांकन रद्ध गरिएको निर्णयले हिंसा भड्काउने चेतावनी दिएका छन् ।
माघ १४ गते, २०६८ मा प्रकाशित
