होलीमा इच्छाविपरीत फोहोरा, लोला हानेको र रङ्ग छर्केको अभियोगमा ६५५ पुरुष, १० महिला पक्राउ,रङ्ग छ्याप्दा छतबाट खसेर २ को मृत्यु

महानगरीय प्रहरी आयुक्त कार्यालयका प्रवक्ता रविराज श्रेष्ठका अनुसार सवारी नियम उल्लंघन गरेको अभियोगमा १ सय ४१ वटा मोटरसाइकल र चार वटा गाडीसमेत प्रहरीले नियन्त्रणमा लिएको थियो।

होलीमा हुनसक्ने सम्भावित दुर्घटना रोक्न महानगरीय प्रहरी आयुक्त कार्यालयले उपत्यकाका तीनवटै जिल्लामा विशेष सुरक्षा व्यवस्था अपनाएको थियो। अघिल्ला वर्षमा सडकमा प्रहरीको उपस्थिति न्युन देखिन्थ्यो। यसवर्ष सुरक्षाका लागि २ हजार २ सय प्रहरी र ३ सय सादा पोशाकमा प्रहरी परिचालित थिए।

सवारी नियम उल्लंघन रोक्न महानगरीय ट्राफिक प्रहरी महाशाखाले स्थानीय चेकिङ र मोबाइल टोलीसमेत परिचालन गरेको थियो। महाशाखाका अनुसार १३ मोबाइल टोली र ३७ स्थानमा चेकिङ पोस्ट राखिएको थियो।

मोटरसाइकलमा तीन जना चढ्ने, हेल्मेट नलगाउने र मादक पदार्थ सेवन गरी सवारी चलाउनेलाई ट्राफिक प्रहरीले नियन्त्रणमा लिएको थियो।

सम्भावित दुर्घटना रोक्न आयुक्त कार्यालयमा जगेडा प्रहरी टोली राखिएको थियो। प्रहरीको हटलाइन १०० मा गुनासो आएलगत्तै कन्ट्रोलले नजिकै खटिएको प्रहरी टोलीलाई गुनासो आएको स्थानमा पठाउने गरेको थियो।