अफगानिस्तानमा सर्वसाधारणको हत्या गरेको आरोपमा अमेरिका झिकाईएका अमेरिकी सैनिक साजेन्ट रोबर्ट बालेसमाथि हत्या अभियोगमा मुद्धा लगाउने अन्तिम तयारी भईरहेको अन्तर्राष्ट्रिय संचार माध्यमहरुले जनाएका छन् ।
गत मार्च ११ मा अफगानिस्तानमा १६ जनाको गोली प्रहार गरी हत्या भएपछि त्यसको दोष बालेसमाथि लाग्दै आएको छ । तर उनीलाई घटनामा संलग्न रहेको भनी प्रमाणित गर्न प्रमाणको अभाव हुने बालेसका वकिलले बताएका छन् ।
अफगानिस्तानमा मारिएकाहरुको शव तत्कालै जलाईएको र घटनाका प्रत्यक्षदर्शीहरुलाई बयानका लागि अमेरिका लैजान कठिनाई हुने भएकाले प्रमाणको अभाव हुने भएको हो ।
१६ जनाको हत्यापछि अफगानिस्तानमा अमेरिका विरोधी प्रदर्शनको लहर तीब्र भएको छ । धेरै अफगानीले अमेरिकी सेनालाई आफ्नो देशबाट विदा हुन दबाब दिईरहेका छन् ।
चैत्र ११ गते, २०६८ मा प्रकाशित
