मानवअधिकारवादी संस्था एम्नेष्टी इन्टरनेशनलले सन् २०११ मा विश्वभर मृत्युदण्ड सजायको लहर चलेको भन्दै चिन्ता जनाएको छ । विशेष गरी मध्यपूर्वका मुलुकहरुमा मृत्युदण्डको सजाय गत वर्ष भन्दा ५० प्रतिशतले बढेको एम्नेष्टीले जनाएको छ ।
एम्नेष्टीले आफ्नो वार्षिक रिपोर्ट सार्वजनिक गर्दै मृत्युदण्डको सजाय बढ्नुमा इराक , इरान र साउदी अरब बढी जिम्मेवार देखिएको उल्लेख गरेको छ । तर विश्वभर अन्य देशले दिएको मृत्युदण्डको सजाय संख्या भन्दा चीन एक्लैले दिएको मृत्युदण्डको सजाय संख्या बढी रहेको प्रतिवेदनमा छ ।
चीनमा मृत्युदण्डको सजाय एक हजार नाघेको एम्नेष्टीको अनुमान छ । मृत्युदण्डको सजाय दिने मुलुकहरुको सूचीमा पांँचौ स्थानमा रहेको अमेरिकामा गत वर्ष ४३ जनालाई मृत्युदण्डको सजाय सुनाइएको भन्दै एम्नेष्टीले यसलाई लज्जास्पद भनेको छ ।
सन् २०११ मा विश्वका २० मुलुकमा गरी ६ सय ७६ जनालाई मृत्युदण्डको सजाय दिइएको छ । सन् २०१० मा भने यो संख्या २३ मुलुकमा ५ सय २७ थियो । विश्वमा हाल २० मुलुकमा मात्र मृत्युदण्डको सजाय सम्बन्धि ब्यवस्था छ ।
चैत्र १४ गते, २०६८ मा प्रकाशित
