विजय श्रेष्ठ
संविधान लेखनका विवादित विषयमा सहमति जुटाउने उद्धेश्यले प्रमुख दलका नेताहरुबीच आज भएको छलफल पनि विना निष्कर्ष स्थगित भएको छ । विहान र दिउँसो गरी दुइ चरणमा बसेको वैठकमा शासकीय स्वरुप, राज्य पुनर्संरचनाका साथै राष्ट्रिय सरकार गठनको विषयमा छलफल भएको नेताहरुले बताएका छन् ।
यसअघि संविधानका विवादित बूँदमा मात्रै छलफल हुंदै आएकोमा प्रमुख तीन दल र मधेशी मोर्चाका शिर्ष नेताहरुको वैठकमा आजदेखि राष्ट्रिय सरकार गठनको विषयमा पनि छलफल शुरु भएको हो । नेताहरुले पर्सिसम्ममा सहमतिमा पुग्ने र पर्सि नै संविधान सभाको वैठक पनि बस्ने पनि बताएका छन् ।
दलहरुबीच शासकीय स्वरुप, राज्य पुनर्संरचनामा तीव्र मतभेद रहेको छ ।
एकीकृत माओवादीले हात्तिवन रिसोर्ट वैठकमा भएको सहमति विपरित जातीय नामका १० प्रान्तको प्रस्ताव अघि सारेपछि संघीयता झन झन विवादमा पर्दै गएको छ । नयाँ संविधान जारी गर्नुपर्ने अन्तिम सीमा जेठ १४ नजिकिंदै जाँदा दलहरुमाथि दबाब बढेपनि सहमतिको बाटो अभैmसम्म देखा परेको छैन ।
यसैबीच, नेताहरु ब्यस्त रहेको भन्दै आजका लागि बोलाइएको संविधान सभाको वैठक पनि बैशाख १९ गतेसम्मका लागि बैठक स्थगित गरिएको छ ।
बैशाख १७ गते, २०६९ मा प्रकाशित
