अखण्ड सुदूरपश्चिम र थरुहटको माग लिएर आन्दोलन गरिरहेका दुई पक्षबीच झडप

कैलाली – अखण्ड सुदूरपश्चिम र थरुहटको माग लिएर आन्दोलन गरिरहेका दुई पक्षबीच मंगलबार धनगढीको क्याम्पस मोडमा झडप भएको छ । झडपमा दुवै तर्फका केही घाइते भएको बताईपनि विस्तृत जानकारी प्राप्त हुन सकेको छैन ।

दुवै पक्षले बन्द आयोजना गरेको हुँदा दुई थरी समूहको जम्काभेटमा झडप हुने गरेको छ । सुरक्षाकर्मीको हस्तक्षेपपछि स्थिति सामान्य बन्दै गएको छ । ठूलो संख्यामा सुरक्षाकर्मी परिचालन गरिएको छ । अखण्ड पक्षधरको सभा पार्कमोडमा हुँदैछ ।

यसैबीच मुढा बजारमा थारुवान/थरुहट पक्षधरका आन्दोलनकारीले मंगलबार बिहान धनगढीबाट लम्कीतर्फ गइरहेको दुई वटा मोटरसाइकल र लम्कीबाट अत्तरिया तर्फ गइरहेको एक वटा गरी तीन वटा मोटरसाइकल जलाइ दिएका छन् ।

थारुवान/थरुहट पक्षधरले गरेको बन्द अवज्ञा गरेको भन्दै उनीहरुले मोटरसाइकलमा आगजनी गरेका बताइएको छ । मोटरसाइकलका नम्बर प्लेट थाहा हुन सकेको छैन । RSS