यो साता अमेरिकामा हुने उत्तर एटलान्टिक सन्धि संगठन नेटोको सम्मेलनमा अमेरिकाले पाकिस्तानी राष्ट्रपति आसिफ अली जरदारीलाई पनि सहभागी गराउने निर्णय गरेको छ ।
पाकिस्तानी मार्ग हुँदै अफगानिस्तानमा तैनाथ नेटो सेनाका लागि समान आपूर्ति गर्ने बिषयमा अमेरिका र पाकिस्तानबीच छलफल भइरहेको बेला नेटो सम्मेलनमा भाग लिन पाकिस्तानलाई निम्त्याएको हो । यद्यपी सम्मेलनमा जरदारी जाने नजानेबारे केही बताईएको छैन ।
यता पाकिस्तानमा रहेका अमेरिकी विदेश मन्त्रालयका प्रवक्ता भिक्टोरिया न्युल्यान्डले नेटो सेनाका लागि सामान आपूर्ति गर्ने बाटो खुलाउने बिषयमा पाकिस्तान सकारात्मक रहेको बताइन् । गत नोभेम्बरमा नेटो सेनाको आक्रमणमा २४ पाकिस्तानी सेना मारिएपछि अफगानिस्तानस्थित नेटो सेनाका लागि खाद्य र अरु सामग्री लैजान दिँदै आएको बाटोमा पाकिस्तानले रोक लगाएको थियो ।
यसप्रति अमेरिकासहित पश्चिमा मुलुकले पाकिस्तानको आलोचना गर्दै नेटो सेनाका लागि खाद्य सामग्री आपूर्ति गर्न बारम्बार आग्रह गरेका थिए ।
यसैबारे छलफल गर्न छ महिनापछि न्युल्याण्ड पाकिस्तान पुगेकी हुन् ।
जेष्ठ ३ गते, २०६९ मा प्रकाशित
