मुख्य दलहरुले नयां संविधानका विषयमा सहमति गरेपनि नयां संविधानमा आफ्ना मागहरुको स्पष्ट सम्बोधन हुने ग्यारेन्टी नभएको भन्दै विभिन्न समूहहरुले बन्दको श्रृंखला शुरु गरेका छन् । ब्राम्हण, क्षेत्री, दशनामी, ठकुरी, दलित, पिछडा बर्ग लगायतले सरकारले आफ्ना मागको सुनुवाई नगरेको भन्दै भोलिदेखि अनिश्चितकालीन आमहडतालको घोषणा गरेका छन् ।
राष्ट्रिय अखण्डता र जातीय सद्भावका लागि संयुक्त संघर्ष समिति बनाएका उनीहरुले सरकारले मागको सुनुवाई नगरेको भन्दै आम हडताल घोषणा गरेका हुन ।
यसअघि लगातार दुई दिने नेपाल बन्द गरेको उनीहरुले जेठ ३ गतेसम्ममा माग पुरा गराउन सरकारलाई अल्टिमेटम दिएका थिए । उनीहरुले चार दलबीच भएको ११ प्रदेशको सहमतिप्रति पनि शंका ब्यक्त गरेका छन् ।
संविधानमा आफ्ना मागहरु सम्बोधन गराउन दबाब दिने क्रममै राप्रपा नेपालले यही जेठ ५ गतेका लागि बन्द आह्वान गरिसकेको छ भने आदिवासी जनजातिहरुले जेठ ७, ८ र ९ गते तथा मुश्लिम समुदायले पनि ७ र ८ गते नै बन्द आह्वान गरेका छन् । RSS
जेष्ठ ४ गते, २०६९ मा प्रकाशित
