फेसबुकका अर्बपति संस्थापक मार्क जुकरबर्गले बिहे गरेको खबरले विश्वभर सनसनी फैलिएको छ । सनसनी फैलनुको कारण चाहिँ ठूला मान्छेले गरेको भूमिगत शैलीको विवाह नै हो ।
जुकरबर्गले अमेरिकाको क्यालिफोर्नियास्थित आफ्नै पाओ आल्टोको घरमा पुरानी गर्लफ्रेन्ड २७ वर्षीया प्रिस्सिला चानसित बिहे गरेका हुन्। जुकरबर्ग उनीभन्दा एक वर्षले जेठा छन। शनिबार भएको विवाह समारोहमा उनले एक सय जनालाई बोलाएका थिए ।
उनको बिहेको खबर यस्तो बेला आएको छ जति बेला फेसबुकले आफ्नो सेयर सर्वसाधारणका लागि बिक्री सुरु गरेको थियो । बिहेमा उनले आफैले डिजाइन गरेको रुबीको रिङ्ग लगाइदिएको जनाईएको छ।
दुवैको भेट नौ वर्षअघि हार्वर्ड विश्वविद्यालयमा भएको थियो, जुन बेला उनले भर्खरै फेसबुक सुरु गरेका थिए।
नवविवाहित चान चिकित्सक हुन् । दुबैले विवाह गरेको जानकारी आफ्नो फेसबुक स्ट्याटसमा उल्लेख गरेका छन । उनले विवाहको फोटो सार्वजनिक गरेको आधा घण्टामै डेढ लाख जनाले लाइक गरेका थिए।
सन् २००४ मा सुरु भएको फेसबुक अहिले संसारकै सबै भन्दा चर्चित सामाजिक सञ्जालको रुपमा विकास भएको छ ।
जेष्ठ ७ गते, २०६९ मा प्रकाशित
