संयुक्त राष्ट्रसंघ सुरक्षा परिषद्ले सिरियामा अनुगमनकर्ताहरुको मिशन सर्वसम्मतिले अन्तिम पटकका लागि भन्दै ३० दिन थपेको छ । ठूला हतियारको प्रयोग नगरिएमा र जारी द्धन्द कम हुंदै गएमा भने अनुगमनकर्ताहरुको मिशन बढाउन परिषद्का सदस्य राष्ट्रहरुले सहमति जनाएका छन् ।
सहमति अघि बेलायतले तयार पारेको प्रस्तावको मस्यौदा विरुद्ध रुसले भिटो प्रयोग गर्ने चेतावनी दिएको थियो । तर मस्यौदा संशोधन भएपछि रुसले पनि मिशनको समय थप्न सहमति जनाएको थियो । गत शुक्रवार मात्र रुसी राष्ट्रपति भ्लादिमिर पुटिनले सुरक्षा परिषद् बाहिर रहेर सिरिया विरुद्ध कुनै पनि कारवाही नगर्न पश्चिमा मुलुकहरुलाई चेतावनी दिनु भएको थियो ।
सिरियामा युद्धविराम लागु हुनुको सट्टा हिंसा बढ्न थाले पछि भने अनुगमनकर्ताहरुले आफ्नो काम स्थगित गरेका थिए । यसैबीच सरकारी सेनाले राजधानीका विभिन्न क्षेत्रमा पकड जमाएर बसेका विद्रोही विरुद्ध आक्रमण तिब्र पारेको छ । सरकारी सेनाले मिदान जिल्ला पून आफ्नो नियन्त्रणमा लिएको जनाएका छन् । विद्रोहीले भने गत विहिवार मात्रै इराक र टर्कीसंग सिरियाको सीमा क्षेत्र नियन्त्रणमा लिएका थिए ।
यता राजधानी दमस्कसमा संघर्ष चर्किन थालेपछि हजारौं सिरियाली जनता छिमेकी मुलकहरुमा पलायन भैरहेका छन् ।
राष्ट्रपति बशार अल असादको शासन विरुद्धको १६ महिना देखीको संघर्षका क्रममा जोर्डनमा मात्रै १ लाख ४० हजार मानिस पलायन भैसकेका छन् भने पछिल्लो २४ घण्टामा मात्रै ३ हजार मानिस इराक पलायन भएको बताइएको छ ।
श्रावण ६ गते, २०६९ मा प्रकाशित
