सिरियाले विदेशी हस्तक्षेप भएमा रासायनिक हतियार प्रयोग गर्ने चेतावनी दिए लगत्तै अन्तर्राष्ट्रिय समुदायले कडा प्रतिक्रिया दिएका छन् । अमेरिकी राष्ट्रपति बाराक ओबामाले सिरियाका राष्ट्रपति बशार अल असादलाई उनको सरकारले रासायनिक हतियार प्रयोग गरे त्यसको चर्को मूल्य चुकाउनु पर्ने चेतावनी दिनु भएको छ ।
संयुक्त राष्ट्रसंघका महासचिव बान कि मुनले रासायनिक हतियारको प्रयोग गर्ने सोचाई नै निन्दनीय भएको बताउनु भएको छ । यस्तै इजरायली प्रधानमन्त्री बेन्जामिन नेतान्याहुले असादसंग नजिक रहेका लेबनानको शिया इस्लामिक समुहको हातमा यस्ता हतियार पुग्न सक्ने आशंका व्यक्त गर्नु भयो ।
सिरियाको विदेश मन्त्रालयका प्रवक्ताले मुलुकमा विदेशी हस्तक्षेप भएमा मात्रै रासायनिक हतियार प्रयोग गर्ने चेतावनी दिएका थिए । उनले हतियार सुरक्षित रुपमा भण्डारण गरिएको र आफ्ना नागरिक विरुद्ध प्रयोग नगरिने स्पष्ट पारेका छन् ।
\यसैबीच विद्रोहीले नियन्त्रणमा लिएको दाबी गरेको एलेप्पो शहरमा सरकारी सेनाले आक्रमण तिब्र बनाए पछि त्यहां भिषण संघर्ष भएको छ । सरकारी सेनाले शहरको केन्द्रीय कारागार नै ध्वस्त पार्ने चेतावनी दिएको अधिकारकर्मीहरुले जनाएका छन् । राष्ट्रपति असादको शासन विरुद्ध १६ महिना यता देखीको संघर्षका क्रममा १५ लाख मानिस घरवारविहिन भएको र १ लाख १५ हजार मानिस छिमेकी मुलुक पलायन भएको अनुमान गरिएको छ ।
श्रावण १० गते, २०६९ मा प्रकाशित
