असंलग्न मुलुकहरुको १७ औं शिखर सम्मेलन भेनेजुयलामा गर्ने निर्णय गर्दै इरानको राजधानी तेहरानमा १६ औं शिखर सम्मेलन सम्पन्न भएको छ ।
सम्मेलनले परराष्ट्र मन्त्री र सचिवस्तरीय तथा मूख्य सत्रमा विभिन्न देशका नेताले पेश गरेका मन्तव्य र विचारका आधारमा तेहरान घोषणापत्रसमेत जारी गरेको छ । घोषणापत्रमा विश्व शान्ति र भाइचारका लागि कुनै पनि पक्षमा नलागी गरीब तथा अल्पसङ्ख्यक देशहरुको साझा सवाल उठाउन आन्दोलन प्रभावकारी रहेको उल्लेख गरिएको छ ।
यसैगरी, शान्तिपूर्ण प्रयोजनका लागी आणविक हतियार उत्पादन गर्न पाउनु कुनै पनि राष्ट्रको नैसर्गिक अधिकार भएको पनि घोषणा पत्रमा उल्लेख छ । अल्पविकसित देशहरुमा फैलिरहेको गरीबी, रोग, शोकबाट मुक्त गर्नका लागि सबैको प्रयास जरुरी रहेको सम्मेलनको निष्कर्ष छ ।
समापन समारोहमा इरानी राष्ट्रपति मोहम्मद अहमदिनेजादले विश्व एकता र भाइचारामा जोड दिनु भएको थियो ।
भाद्र १६ गते, २०६९ मा प्रकाशित
