अफ्रिकी मुलुक अंगोलामा भएको संसदीय चुनावमा ३२ बर्षदेखि सत्तामा रहेका राष्ट्रपति जोसेफ ईडुवार्डो डोस सान्तोसको एम.पी.एल.ए. पार्टी भारी मतान्तरले विजयी भएका छन ।
आम निर्वाचनमा सान्तोषको पार्टीले हाल सम्म गणना भएको दुई तिहाई मतपत्र मध्ये ७५ प्रतिशत मत प्राप्त गरेको बताईएको छ । खनिज तेलको धनी देश अंगोलामा एक दशक अघिको गृहयुद्ध समाप्त भएपछि भएको यो दोस्रो आम निर्वाचन हो । गृहयुद्ध समाप्ती यता देशमा तीब्र आर्थिक प्रगति भएको भन्दै सान्तोषको समाजवादी पार्टीले गर्व गर्दै आएको छ ।
अंगोलामा विपक्षी युनाईटेड पार्टीले १८ प्रतिशत भन्दा कम मत प्राप्त गर्ने संकेत देखिएको छ । गत शुक्रबार आम निर्वाचनको मतदान भएको थियो । अमेरिका लगायतका पश्चिमा देशले अंगोलाको शासन ब्यवस्थाप्रति विरोध जनाउंदै आएका र हालै त्यहा केही युवाहरुले सान्तोष विरुद्ध प्रदर्शन पनि गरेका थिए ।
भाद्र १७ गते, २०६९ मा प्रकाशित
