अफगानिस्तानमा भर्खरै तैनाथ भएका बेलायतका राजकुमार ह्यारीलाई तालिवानद्धारा मार्ने धम्की

अफगानिस्तानमा भर्खरै तैनाथ भएका बेलायतका राजकुमार ह्यारीलाई तालिवानले मार्ने धम्की दिएको छ । तालिवानका प्रबक्ताले २७ बर्षीय राजकुमार ह्यारीलाई समाउन वा मार्न अधिकतम प्रयास गर्ने बताएको अन्तर्राष्ट्रिय संचार माध्यमहरुले जनाएका छन् ।सेनाका क्याप्टेन तथा बेलायती मुकुटका तेस्रा हकदार ह्यारी गत साता अफगानिस्तान पुगेका हुन् । अफगानिस्तानको सबैभन्दा खतरनाक युद्ध क्षेत्र सावित भएको दक्षिणी हेल्मान्डमा तैनाथ छन् ।

बेलायती लडाकु अपाचे हेलिकोप्टरका पाइलट ह्यारीलाई समाउन प्रयास गर्ने र त्यसो नभए हतियारको निशाना बनाउने धम्की तालिवानले दिएको छ ।

उनको तैनाथलाई एउटा लडाकू समूहले प्रोपागान्डा स्टन्ट भनेको दुई दिनपछि ह्यारीलाई मार्ने नयाँ सूचना जारी गरिएको हो । तालिवानले उनको अफगानिस्तान तैनाथलाई अमेरिकामा उनले गरेको कुकर्म लुकाउने प्रयास भनेको थियो ।

अघिल्लो महिना लस भेगासको एउटा पार्टीमा उनी नांगो देखिएपछि यी अपाचे पाइलट संसारभरका अखबारहरुमा छाएका थिए । ह्यारीले अब हेल्मन्डको कडा सुरक्षायुक्त बास्टियन शिविरमा चार महिना बिताउनेछन् ।

सन् २००८ मा उनले तालिवानलाई लक्षित गरी हवाई आक्रमण गरेको समाचार विदेशी सञ्चारमाध्यममा आएपछि ह्यारीलाई अफगानिस्तानबाट तत्काल फिर्ता डाकिएको थियो । Agencies