हिन्दूहरुको महान् चाड बडा दशैंको आज आठौँ दिन महाअष्टमी मुलुकभर दुर्गाभवानीको पूजा आराधना गरी महाअष्टमी पर्व मनाइँदै छ ।
देशभरिका दसैं घरमा आज केराको पातमा चामलको ९ थुप्रा लगाएर त्यसमा जनै सुपारी नैवेद्य तथा भेटी राखेर नवदुर्गाको पूजा आजा गर्ने चलन छ ।
साथै आजै आफूले प्रयोग गर्ने फलामका औजारहरु खुकुरी तरबार खड्गहरुलाई पनि दसैं घरमा राखेर पुजाआजा गर्ने गरिन्छ ।
आजै बेलुका घरघरमा शक्तिस्वरुपा महाकालीको विशेष पूजा आराधना गरेर कालरात्री गरिन्छ । शक्ति स्वरुपा महाकालीकै आराधना र पूजाका लागि भरे बेलुका देशभरिका सेनाका गण गुल्म तथा कोट र पुराना दरबारहरुमा कालरात्री गर्ने चलन छ ।
कालरात्रीमा काठमाडौं वसन्तपुरको कोतघरमा ५४ राँगा तथा बोकाको बलि दिने चलन छ । मध्यरातमा गरिने विशेष पूजाबाट देवी खुशी भएर शत्रुनाश गर्छिन् भन्ने जनविश्वास छ । दसैंमा आफन्तसँग बसेर मासु खान मन पराउनेहरुले आज आफ्नो घरको आँगन तथा दैलोमा खसी राँगोलगायतका पशु मार हान्छन् । दसैंका लागि भोलि पनि मासुका लागि बलि दिने चलन छ ।
त्यस्तै आज महाअष्टमीका अवसरमा देशभरिका महाकाली महालक्ष्मी र महासरस्वती देवीका मन्दिरहरुमा विशेष भीड लागेको छ । काठमाडौंका दक्षिणकाली गुह्येश्वरी बज्रबाराही सङ्कटा बङ्गलामुखीलगायतका शक्तिपीठहरुमा पूजा गर्ने तथा पशुबलि दिनेहरुको घुइँचो छ । त्यस्तै काभ्रेको पलााचोक भगवती गोरखाको गोरखकाली तथा मनकामना सप्तरी सखडा-छिन्नमस्ता नुवाकोट भैरवी डोटीको शैलेश्वरी धरानको दन्तकाली भोजपूरको सिद्धकालीलगायतका मन्दिरहरुमा दर्शनार्थीको घुइँचो छ । देशभरिका हिन्दूहरुले आज घर आसपासका स्थानीय देवी मन्दिरहरुमा पनि दसैंको भाकल पूजा गर्दैछन् ।
यसैगरी राष्ट्र प्रमुखका हैसियतले राष्ट्रपति डा. रामवरण यादवले आज राजधानीको शोभाभगवती नक्सालभगवती जयबागेश्वरी गुह्येश्वरीलगायतका शक्तिपीठहरुमा पुगेर पूजापाठ गर्नुहुने कार्यक्रम छ ।
कार्तिक ६ गते, २०६९ मा प्रकाशित
