बाँकेको महादेवपुरी गाविसका किशोरीहरु विद्यालय शिक्षकहरुबाट कक्षा कोठामै यौन दुव्र्यवहार सहन बाध्य रहेको पाइएको छ । शिक्षकले गृहकार्य नगरेको वा सोधेको प्रश्नको उत्तर दिन नसकेको निहुँमा उनीहरुमाथि यौन दुव्र्यवहारसमेत गर्ने गरेको छात्राहरुको गुनासो छ ।
शिक्षकबाट पीडित महादेवपुरी गाविस-५ ढकेरीकी कक्षा-८ की १७ वर्षीया एक छात्राले शिक्षा हासिल गर्न विद्यालय पुगेका कक्षा ६ देखि १० सम्मका किशोरी विद्यार्थीहरु सबैभन्दा बढी यौन दुव्र्यवहारमा पर्ने गरेको बताउँदै शिक्षकले माया गरेको जस्तो गरेर शरीर सुम्सुम्याउने, अश्लील शब्दहरु प्रयोग गर्ने, भित्री कपडाहरु तान्न खोज्ने प्रवृत्तिले कतिपय किशोरीले बीचमै पढाइ छाड्ने गरेको जनाइन् ।
आफूलाई शिक्षा दिने शिक्षकबाट नै किशोरी छात्राहरु यसरी यौन दुव्र्यवहारको सिकार भइरहेका छन् भने अर्कोतर्फ महिनावारीको समयमा उनीहरुले पढाइ नै छाड्नुपर्ने अवस्था छ ।
महिनावारी हुँदाको समयमा विद्यालयमा आफूहरुले अनेकौँ समस्या र असहजस्थिति भोग्न बाध्य हुने गरेको किशोरी विद्यार्थी टीका डाँगी र दुर्गा विक बताउँछन् ।
किशोरीहरुको क्षेत्रमा काम गर्दै आएको सिविनले एक सर्वेक्षण गरेर किशोरीहरु शिक्षकबाटै दुव्र्यवहारको सिकार भएको तथ्याङ्क सार्वजनिक गरेको छ । सो संस्थाका रमा अर्यालका अनुसार यौन शिक्षाको अभावमा कतिपय किशोरीलाई आफूमाथि हुने गरेको व्यवहार यौन दुव्र्यवहार हो भन्ने नै ज्ञान नरहेको पनि पाइएको छ । रासस
माघ २३ गते, २०६९ मा प्रकाशित
