जनयुद्ध सुरु गरेको दिनको सम्झनामा एकीकृत नेकपा माओवादीले आज १८ औं जनयुद्ध दिवस मनाउँदैछ । माओवादीले २०५२ फागुन १ गते रोल्पा, सिन्धुली र गोरखाका प्रहरी चौकीमाथि आक्रमण गरी सशस्त्र युद्धको सुरुवात गरेको थियो ।
माओवादीले जनवादी राज्यसत्ता स्थापना गर्ने घोषणासहित थालेको जनयुद्धका क्रममा झन्डै १४ हजार नेपालीले ज्यान गुमाएका थिए । माओवादीले फागुन १ गतेलाई जनयुद्ध दिवसका रुपमा मनाउँदै आएको छ । पछिल्लो महाधिवेशनबाट जनयुद्धको कार्यदिशालाई औपचारिक रुपमा परित्याग गरेको एमाओवादीले दिवस भने मनाइरहेको छ ।
जनयुद्ध दिवसको अवसरमा एमाओवादीले राजधानीको खुलामञ्च लगायत देशका विभिन्न प्रमुख शहरहरुमा जनयुद्ध दिवसको सम्झना गर्दै सभा गर्दैछ ।
जनयुद्ध दिवसको अवसर पारेर विज्ञप्ती जारी गर्दै एकीकृत माओवादीका अध्यक्ष पुष्पकमल दाहाल प्रचण्डले नेपाली समाजको क्रान्तिकारी रुपान्तरणमा जनयुद्धले बहुआयामिक दुरगामी प्रभाव पारेको बताउनुभएको छ । जनयुद्धकै आधारमा क्रान्तिकारी पार्टी देशको सबैभन्दा ठूलो राजनीतिक दल बन्न पुगेको बताउनुभयो ।
जनयुद्ध दिवस मनाउन आएका माओवादी नेताको दुर्घटनामा मृत्यु
जनयुद्ध दिवस मनाउन काठमाडौं आउँदै गरेका एकीकृत नेकपा माओवादीका नेता कार्यकर्ता चढेको बस दुर्घटना हुँदा एकको मृत्यु भएको छ । घटनामा १० जना घाइते भएका छन् ।
हेटौडाबाट काठमाडौं आउँदै गरेको ना २ च ३४८२ नम्बरको टाटा सुमो जिप सिस्नेरी र काठमाडौंको सीमा थैमले-४ केरोबारीमा सडकबाट झण्डै ३ सय मिटर तल खसेको थियो । दुर्घटनामा माओवादी मकवानपुरका सदस्य हटिया-५ का पुष्कर राईको मृत्यु भएको छ ।
दुर्घटना घाइते भएका मध्ये ७ जनाको शिक्षण अस्पताल महाराजगञ्ज र ३ जनाको बल्खुमा उपचार भइरहेको प्रहरीले जनाएको छ ।
फाल्गुन १ गते, २०६९ मा प्रकाशित
