बन्दी बनाइ राखिएका अफ्गानी तालिबानका सबैभन्दा उच्च तहका नेतालाई पाकिस्तानले रिहा गरेको समाचारको अफ्गान सरकारले स्वागत गरको छ।
पाकिस्तानी अधिकारीहरूले मुल्लाह अब्दुल गानी बरादारको रिहाइको समाचार सार्वजनिक गरे पनि त्यसको आधिकारिक रूपमा पुष्टी भएको छैन।
पाकिस्तानी कारागारबाट मुक्त गरिएको भनिएका उनी अफ्गान तालिबानका सहसंस्थापक हुन्।
उनले अन्य तीनजनासित मिलेर सन् १९९४ मा अफ्गानिस्तानमा तालिबान विद्रोह शुरू गरेका थिए।
उनले तालिबान सरकारको पतन हुनअघिसम्म कयौं वरिष्ठ पद सम्हालेका थिए।
त्यसपछि उनी भागेर पाकिस्तान पुगेका थिए।
त्यहाँ तालिबानले अफ्गानिस्तानमा गुरिल्ला लडाईं लड्न पुनर्संगठन गरिरहँदा उनले सो विद्रोही समुहको सैन्य कमाणडरका रूपमा काम गरेका थिए।
उनलाई पाकिस्तानको कराची शहरमा सन् २०१० मा पक्राउ गरिएको थियो।
अफ्गान सरकारले आफ्नो देशको शान्ति प्रक्रियालाई सहयोग पुगोस् भनी मुल्लाहको रिहाइकालागि पाकिस्तानसित अनुरोध गरेको थियो।
आश्विन ६ गते, २०७० मा प्रकाशित
