अर्घाखाँचीमा निर्वाचन अचारसंहिता पूर्णरुपमा पालना गर्ने अर्घाखाँचीका सबै दलका सबै उम्मेद्धारको एउटै मञ्चबाट प्रतिवद्धता

निर्वाचनमा भाग लिने अर्घाखाँचीका राजनीतिक दलहरुले एउदै मञ्चमा बोल्दै निर्वाचन अचारसंहिताको पूर्णरुपमा कानूनको परिधिमा रहेर पालना  गर्ने प्रतिवद्धता जनाएका छन् । 

एकिकृत नेकपा माओवादी अर्घाखाँची क्षेत्र नं. १ का उम्मेदवार टोपबहादुर रायमाझीले आफ्नो पार्टी स्वच्छ निर्वाचन चाहेको बताउदै एमाओवादीले अचारसंहिताको उल्लंघन गर्ने पक्षमा नरहेको भन्दै कहिँ कतै भएमा खवरदारी गर्न  आग्रह गरे । त्यस्तै  क्षेत्र नं. २ का उम्मेदवार विष्णुहरि शर्माले निर्वाचनको सबै नागरिकले  प्रत्याभूति गर्न पाउनुपर्ने भएकाले सबै मिली निर्वाचन सम्पन्न गनु पर्ने बताए ।  

नेपाली  कांग्रेस अर्घाखाँची क्षेत्र नं. १ का  उम्मेदवार डा रामबहादुर बि.सीले कांग्रेसले भयरहित वातावरणमा चुनाव सम्पन्न गर्न चाहेकाले निर्वाचन आयोगले जारी आचारसंहितालाई पालना गर्न कांग्रेस तयार रहेको बताए । कांग्रस क्षेत्र नं. २ का उम्मेदवार पुष्पा भुसालले दोस्रो संविधान सभाले जसरी पनि संविधान जारी गर्ने बताउदै निर्वाचनमा कुनै पनि दलले तडकभडक नगरि शान्त वातावरणमा निर्वाचन सम्पन्न गर्नु पर्ने बताइन् । 

  

रिपोर्र्टर्स क्लब जिल्ला शाखा अर्घाखाँचीचीले सदरमुकाम सन्धिखर्कमा गरेको साक्षात्कार कार्याक्रममा बोल्दै उनीहरुले निर्वाचनलाई भयरहित बातावरणमा सम्पन्न गर्नका लागि अचारसंहिताको पूर्ण रुपमा  कार्यान्वयन गर्ने राजनितिक दलका नेताहरुले  प्रतिवद्धता जनाएका हुन ।   

नेकपा एमालेका जिल्ला अध्यक्ष चेतनारायण आचार्यले सुरक्षाको विषय चुनौती पूर्ण रहेकाले सुरक्षा निकायले निर्वाचनलाई स्वच्छ बनाउन विशेष ध्यान दिनुपर्ने बताए । उनले एमालेले निर्वाचन आचारसंहितालाई पूर्णरुपमा पालना गर्ने बताए । 

नेकपा -माओवादीका केन्द्रिय सदस्य भेषराज भुसालले मंसिर चारको निर्वाचनले देशलाई निकास दिन नसक्ने भएकाले आफ्नो दलले सहमति चाहदाचाहदै पनि ठुला दलहरुले नेकपा- माओवादीलाई वाइपास गरेर निर्वाचनमा गएको आरोप लगाए । 

राप्रपा नेपालका क्षेत्र नं १  का  उम्मेदवार विरेन्द्र सिहंले आचारसंहिता नमान्ने दललाई कारवाहीको दायरामा ल्याउनुपर्ने बताए ।  

मुख्य निर्वाचन अधिकृत ब्रजेश प्याकुरेलले जिल्लामा अहिले सम्म कहि कतै आचारसंहिता उल्लघंन भएको नपाइएको बताए । उनले सबै दलहरुले अचारसंहितालाई पालना  गरेमा निर्वाचन सफल पार्न गाह्रो नहुने बताए । प्रमुख जिल्ला अधिकारी सागरमणि पाठकले जिल्लाका दुबै निर्वाचन क्षेत्रमा चुनाव स्वच्छ र धाधली रहित वातवरणमा  सम्पन्न हुने बताए । उनले निर्वाचनलाई केन्द्रित गरेर जिल्ला सुरक्षाा  समितिले सुरक्षा व्यवस्था  मजबुत पारेको बताए । प्रजिअ पाठकले निर्वाचन आचारसंहितालाई सबैले पालना गर्नु पर्ने बताए  । 

प्रहरी नायव उपरिक्षक हीराबहादुर पाण्डेले निर्वाचनलाई मध्यनजर गर्दै सुरक्षा व्यवस्था कडा परिएको बताए । उनले प्रहरीले उम्मेदवार तथा मतदाताहरुलाई सुरक्षा प्रदान गर्न कुनै कसुर पनि बाँकी नराख्ने बताए  । 

कार्यक्रममा एमाओवादीका केन्द्रिय सदस्य चन्द्रबहादुर खडका, नेपाली कांग्रेसका जिल्ला सभापति कमलप्रसाद भुसालले मन्तव्य राखेका थिए ।